Zerigiw. Bul so’z ko’plegen adamlarg’a tanis. O’mirdin’ u’ndew belgileri menen, o’zlerimizge unamaytug’in ka’sipti tan’lag’an boliwimiz mu’mkin, yamasa o’zimiz unatip tan’lag’an bolsaq ta, islerimiz ha’mme waqit birdew bolg’ani ushin zerigemiz. Zerigiw bul biykarshiliq emes eken. Biykarshiliqtan zerikken adamlar da bar eken. Biraq jumisinan, ku’ndelikli o’mirinen zerigiw ko’pshilikte bar. O’tken sapari sa’wbetimizde sharshawshiliq haqqinda so’ylesken edik. Zerigiw de sharshawdi keltiredi eken.

Islep atirg’an jumisin’izdan kewlin’iz tolmasa, ka’sibin’iz sizge quwanish a’kelmese, odan zerikesiz, zeriksen’iz de ila’jsizliqtan jumisqa barasiz, bunday kewilde jumis islew adamdi sharshatadi. Fizikali ha’reketten ko’re, sezimli jag’dayimiz sharshatadi. Izertlewshiler oqiwshilarg’a zerikerli tekstti 90 minut dawaminda oqiwdi tapsiripti. Bul tekst oqiwshilar ushin zerikerli bolip, oqiw waqitinda ko’pshilik oqiwshilar u’yqilap qalipti, geybirewlerinin’ baslari awiripti, ko’zleri talipti, ashiwlari kelip baslapti. Demek, adam o’zi qiziqpag’an is penen shug’ullansa usinday jag’daylar boladi eken.

Aqliy miynet ko’plegen adamdi sharshatpaydi, biraq ku’n dawaminda qiliwg’a u’lgermegen jumislar adamdi sharshatadi. Belgili bir jumis qilmasaqta, biraq ku’nnin’ aqirinda u’yge ayaqlarimizdi su’yrep, baslarimiz awirip qaytamiz. Jumisimizdi o’zgertiwdin’ ila’ji joq. Ba’lkim kimlergedir ila’ji bar boliwi mu’mkin, biraq ha’mmenin’ de emes. Solay eken, jumisimizdi qolimizdan kelginshe qiziq boliwi ushin ha’reket etiwimiz kerek eken.

Ha’r ku’ni ko’birek is qiliwg’a ha’reket etiwimiz lazim. Ku’nnin’ aqirinda esaplap, bu’gin qansha iske u’lgergenimizdi ko’rsek boladi. Sonda zerigiw ha’m sharshawdan qutilamiz. Budan tisqari unamli ta’repleri haqqinda da pikirler ju’ritiwimiz o’zlerimiz ushin paydali. Bul kewilimizdin’ ko’teriliwi ushin da jaqsi. Bas awiriwlar da kemeyedi. En’ a’hmiyetlisi jumisimizdan zerikpeymiz.