Assalawma a’leykum Danaliq radiosi tin’lawshilari. Sizler menen ja’ne efirde diydar ushirasip turg’animizdan quwanishlimiz. Doslar, eger tuwisqanlar arasinda Quday ta’repinen berilgen inamlar haqqinda ga’p barsa, ko’pshilik ha’r tu’rli inamlar haqqinda aytadi. Egerde kimnendir usi inam haqqinda sorasan’iz, “yaq, mende Xosh xabar aytiw inami joq” degen juwapti esitesiz.
Bizlerdin’ pikirimizshe, Xosh Xabar aytiw inami barliq masixiylerde bar yamasa oni rawajlandiriw kerek. Xosh Xabar aytiw ushin aldin Xosh Xabar o’zi ne ekenligin tu’sinip aliw ju’da a’hmiyetli. Xosh Xabar grek tilinde “Evangelion” degen ma’nisti bildiredi. “Quwanishli yamasa jaqsi xabar” ha’m “Jen’is haqqinda xabar” degen ma’niske de iye. “Evengelion” so’zi Rim imperiyasinda da paydalanilg’an so’z eken. Misali, sol waqitta egerde imperatordin’ hayali ul tuwsa, xaliqqa “Evangeliye” dep jar salg’an.
Demek, bul ul perzent keleshekte imperator boladi, degen ma’nisti bildirgen, sonliqtan “Evangelie” yag’niy “Jaqsi Xabar” dep baqirg’an. Xaliq ta “Evangelie” so’zin esitkende qatti quwang’an. Hu’kimettin’ buyriqlari ha’m nizamlari da “Evangelie” dep atalg’an eken. Eski Kitapta “Evangelie” so’zi bir ma’rte de tilge alinbag’an, ba’lkim onin’ ornina eski grek tilinde “basar” so’zi paydalanilg’an. Bul so’zdin’ ma’nisi de “Jaqsi ha’m quwanishli xabar” degen ma’niske iye bolg’an.
Ja’ne grek tilinde “miyweli” degen so’z de “Xabarshi, jaqsi xabar alip keliwshi” degen ma’niste de paydalanilg’an. Bul so’z Iyshaya Payg’ambardin’ kitabinda ko’birek jazilg’an ha’m “Iysa Masiyx” haqqinda payg’ambarshiliq etilgen. Jan’a Kelisimdegi “Evangelion” so’zdin’ ma’nisi bul Iysa Masiyxtin’ tuwiliwi, o’miri ha’m Onin’ isleri ha’m barliq adamlardin’ gu’nasi ushin o’limi haqqinda aytilg’an.
Demek, Jan’a kelisimdegi Xosh Xabardi adamlar tek g’ana esitip, tin’lap qoymay, al bir-birine Iysa Masiyx haqqindag’i Xosh Xabardi jetkeriw kerek ekenin Iysa bizlerge u’yretip atir. Iyshaya payg’ambar da bul haqqinda payg’ambarshiliq qilg’an. Eger Iyshaya kitabinin’ 52 bap 7 ayatin oqip ko’rsen’iz, bul haqqinda bilip alasiz. Iysa Masiyx ha’m Aspan Patshalig’i temalari bir-birine ju’da baylanisli. Xosh Xabar aytiliwi menen Aspan Patshalig’i jaqinlasadi. Xosh Xabardi aytiw ushin startti Iyemiz Iysa baslap berdi. Doslar, Xosh Xabar aytiwdin’ waqit saati keldi.
