Hu’rmetli tin’lawshilar, sizler menen bu’gingi esittiriwimizde xojalig’imizdin’ pullari haqqinda azg’ana bolsada sa’wbetlesip baramiz. Bul jerde bir soraw payda boladi. Xojaliqtin’ puli degen neni bildiredi? A’lbette bul sorawg’a juwap beriw onshelli qiyin emestey ko’rinedi. Xojaliqtin’ puli bul xojaliq ag’zalari menen birgelikte islep tapqan ortaliq qa’rejetleri bolip tabiladi. Endi usi qa’rejetti durisli sariplaw ushin bizlerge Jaratqannin’ danalig’i kerek boladi. Xojaliqta birigip pul tapqannan son’ oni u’neplep sariplawdin’ da jollarin biliwimiz kerek. Egerde qa’rejetti durisli sariplawdin’ jollarin bilmesek a’lbette bunnan xojalig’imiz azap shegiwi aniq.

Hu’rmetli tin’lawshi doslar, bizler xojaliq ag’zalari menen birgelikte qa’rejetlerdi tejewdin’ usillarin jaqsi biliwimiz lazim. Bunin’ ushin a’lbette shan’arag’imizg’a tek g’ana kerekli bolg’an na’rselerdi satip aliwdi tuwri jolg’a qoyiwdi biliwimiz kerek boladi. Sonin’ menen birge ha’dden tis “qizg’anshaqliq” qiliwimizda onshelli jaqsi emes. Biz balalarimizdin’ ha’m basqa shan’araq ag’zalarimizdin’ mu’tajliklerin de jaqsi biliwimiz kerek. A’sirese jas balalarda ushirasatug’in na’rse, egerde olar menen birigip bazar yamasa du’kang’a baratug’in bolsan’iz a’lbette olar nenidur satip aliwdi qa’leydi. Usinday jag’dayda sizlerge a’lbette danaliq kerek boladi. Bul jerde sizlerge bir na’rseni aytip o’tpekshimiz.

Eger de balalarin’izdin’ qa’legen na’rsesi olarda bar bolsa jaqsi so’z benen olarg’a tu’sindiriwge ha’reket etip ko’rin’. Al endi sonda da olar o’zinin’ qa’lewinde qatip turip alsa ne boladi? Menin’ o’zim to’mendegishe usil qollanaman, a’ste aqirinliq penen satiwshig’a bul na’rsenin’ satilmaytug’inlig’in balalarg’a tu’sindirip aytiwin iltimas etemen. Geypara waqitlari bul da ja’rdem beredi. Biraq geyde xojaliq ku’nin belgilewdi de yadin’izdan shig’arman’. Bunday waqitlari siz shan’arag’in’iz benen birgelikte sayahat etip keliwin’iz mu’mkin. Ya bolmasa birigelikte qanday da bir jerge awqatlaniwg’a da bariwin’iz mu’mkin. A’lbette bunday islerdi a’melge asirmastan aldin xojalig’in’iz qarjilarina ziyan keltirmewin’iz haqqinda da oylanip ko’riwin’iz lazim.

Ne bolg’anda da xojalig’in’iz ushin belgili bir mug’dardag’i qa’rejetlerdi saqlap qoyg’anin’iz ma’qsetke muwapiq boladi. Sebebi o’mirde ha’r qiyli waqiyalar boliwi mu’mkin. Kimdir kesel bolip qaliwi mu’mkin. Uliwma usinday ku’tilmegen waqiyalar ushin biraz pulin’iz saqlanip turg’an bolsa, a’lbette kimlerdendur qariz aliw ushin ha’reket etpeysiz. A’lbette bizlerge jaqsi belgili Muxaddes Kitapta erten’gi ku’n ushin ta’shwishlenbewimiz haqqinda aytilg’an. Biraqta bul xojalig’in’iz ushin uliwma qayg’irman’ ya bolmasa sizge uliwma qa’rejettin’ keregi joq degeni emes. Bul degeni tek g’ana bayliq toplaw menen a’were bolip qalman’lar degendi bildiredi.

Geypara adamlarda bunday mashqala joq emes, bul mashqalani a’lbette du’zetiw kerek boladi, yag’niy qaltasindag’i belgili summanin’ ha’mmesin sawiwg’a ha’m kereksiz na’rselerdi de kerekli dep ko’rip sawda qiladi. Bul o’z-o’zinen belgili bolg’aninday xojaliq pullarin tejewge emes, kerisinshe onin’ omiriliwina alip keledi. Egerde sizde bunday mashqala bar bolsa a’lbette Qudayg’a mu’ra’jet etin’, sizlerge Ol tap usi ma’sele boyinsha danaliq bersin. Hu’rmetli tin’lawshilar bu’gingi esittiriwimiz o’z juwmag’ina jetti. Endi sizler menen xoshlasip xojalig’in’izg’a Jaratqannan qut bereket sorap qalamiz.