Assalawma a’leykum hu’rmetli doslar. Bu’gin sizler ushin tayarlag’an temamiz “til” haqqinda. Mikrofon aldinda sizler menen Sarbinaz. Xalqimiz arasinda “Til su’yeksiz” degen ga’p bar. Muxaddes Kitabimizda ha’mmemiz de oqitiwshi bolmayiq degen ga’p bar. Oqitiwshilar basqalarg’a qarag’anda qattiraq hu’kim etiledi eken. Duris ko’pshiligimiz adasamiz, ko’p qa’teler qilip turamiz. Biraq eger bizler tilimizdi jaqsi ha’m duris basqara alsaq, onda bizler es-aqilimiz tolg’an bolip, pu’tkil denemizdi de basqara alamiz.

Eger attin’ awzina bir na’rse salsaq, oni qa’legen jag’imizg’a izimizden erite aladi ekenbiz. U’lken kemeni qozg’altiw ushin ku’shli samal talap etiledi, biraq keme kapitani bul u’lken kemeni qozg’altiw ushin kishkene rul isletedi. Bizlerdin’ tilimiz de kishkene bolsada biraq ol ko’plegen u’lken na’rseler haqqinda maqtanadi.

Azg’antay g’ana ot u’lken tog’aydi jandiradi. Tilimiz de usinday kishkene otqa uqsaydi. Tilimiz jawiz ku’shke de iye bolip, ol pu’tkil denemizdi de pataslap, o’mirimizdi tuwri dozaqtan kelip turg’an otta da jandira aladi eken. Barliq haywanlar, quslar, jer bawirlawshilar, ha’tteki ten’iz haywanlari da, adam ta’repinen qolg’a u’yretile aladi eken. Biraq bizlerdin’ bul kishkene tilimiz u’yretiliwi qiyin eken. Ol hesh sharshamaytug’in, gey de jaman uw siyaqli na’rselerdi de tarqata aladi eken.

Qa’dirli doslar, bizler bul tilimiz benen Quday A’kemizdi alg’islaymiz ha’m jaman na’rseler haqqinda da so’yleymiz. Berilgen bul bir til menen Jaratqan Iyemizdi alg’islap ha’m adamlardi jamanlawimiz, g’arg’awimiz duris emes. Kir ha’m taza suw birge ag’a alama? Alma terek anar bere alama? Duzli suw ag’atug’in jerden taza suw ala alamizba?

Doslar, kelin’, bu’gin tilimizdi o’zgerttiriwge ha’reket eteyik. Bul tilimiz benen tek g’ana Qudaydi maqtayiq. Eger qiyin bolsa Qudaydan tilimizdi basqariwda ja’rdem sorayiq. Sebebi bizler bilemiz Quday A’kemiz bizlerge ja’rdem beriwge ha’mme waqit tayar. Sebebi Ol bizlerdi su’yedi.