Assalawma a’leykum tuwisqanlar. Kelin’, keshirm beriw jolindag’i qa’demlerdi ja’ne bir ma’rte ko’rip shig’amiz: Sizdi kimdir qapa qildi. Siz bolip o’tken waqiyani tu’sinip, ishki-sezimlerin’izdi aniqlastirip aldin’iz. Sizdi qapa qilg’an adamdi tu’siniwge ha’reket ettin’iz ha’m malum bir da’rejede oni aqlawin’iz da mu’mkin. Sog’an qaramay, ju’regin’izde keshiriwin’iz qiyin bolg’an bir na’rse qalip ketti. Sizdi qapa qilg’andi keshiriw ushin o’zin’izde ku’sh ha’m miyrimdi qalay, qay jerden alasiz?

Jarasa almawshiliqtan ha’m mu’na’sa’betler endi tiklenbewi mu’mkin ekenliginen qorqasiz ba? Yamasa ha’mmesi sizdi qapa qilg’an adamg’a baylanisli ma? Eger ol shin ju’reginen keshirim sorasa ha’m sizde ken’ peyillik sezimin oyata alsa, oni keshirermedin’iz? Keshirim beriwin’iz bul isti qay da’rejede qa’lep atirg’anin’izg’a baylanisli ma? Qa’dirli doslar, keshirim beriwde en’ a’hmiyetke iye bolg’an na’rse bul – su’yispenshilik.

Eger bizler birewdi su’ysek, oni o’zlerimizden uzaqlastirmawg’a ha’reket etemiz. Eger bul adam bizlerge qa’dirli bolsa, oni eski kiyimge uqsap o’mirimizden shig’arip taslay almaymiz. Oni jog’altiw barmag’imizdi jog’altiw menen ten’ boladi. Ko’pshiligimiz keshirimli boliwg’a balalig’imizdan a’detlengenbiz. Bizler buni su’yikli h’m hu’rmetke ilayiqli ata-anamizdan ha’m ta’rbiya beriwshi ustazlarimizdan u’yrgenbiz. Bizler ha’mme waqit qa’te qilamiz. Sog’an qaramay jaqinlarimiz bizlerdi keshiredi. Usinin’ tiykarinda bizler su’yikli ha’m keshirilgen boliwdin’ qanday ekenligin bilip baramiz ha’m o’z na’wbetinde bul ta’jiriybe o’mirimiz dawaminda basqalardi jaqsi ko’riwde ha’mde keshirim beriwde bizlerge ja’rdem beredi. Waqit o’sken sayin, u’lkenlerden pariq qilmaytug’inimizdi tu’sinip jetemiz. Olar da geyde nahaq ekenliklerin ta’n aladi ha’m bizler olardi keshiremiz. Bul na’rseler bizlerdi ha’tteki jaqinlastiradi, sebebi bizler o’zlerimizdi ten’ dep ko’remiz. Geybir sebeplerge ko’re balaliqta bul sabaqti jaqsi o’zlestirmegen boliwimiz mu’mkin.

Su’yispenshilik qapashiliqti jen’iwi mu’mkinligin bizler seze almaymiz. Keshiriwimiz qiyin, iseniwimiz bolsa qiyin boladi. Bunday jag’day bolg’an bolsa, bizler ju’regimizdi isenetug’in jaqin adamimizg’a aship, bul haqqinda so’ylesip aliwimiz lazim. Jaqsi ko’riwdi u’yreniw hesh qashan kesh emes. Biraq, su’yispenshiliktin’ jilli sezimlerin seziw jeterli emes. Quday bizlerge ha’mmeni jaqsi ko’riw kerek, dep aytqan bolsa da, bizler ha’mme menen de jaqin mu’na’sebette bola almaymiz. Qutqariwshi Iysa Qudaydin’ en’ tiykarg’i talabin bilay aytqan: “Qudayin’ Jaratqan Iyeni shin ju’rekten, jan-ta’nin’ ha’m pu’tkil aqil-oyin’ menen su’y, O’zin’di su’ygenin’ siyaqli, janin’dag’i adamdi da su’y”. Bul Quday ushin ha’r bir insan qa’dirli ha’m a’hmiyetli degen ma’nisti bildiredi. Barliq adamlar Ol ushin ten’dey qa’dirli.