Assalawma a’leykum hu’rmetli radiomiz iqlasbentleri. Efirde ma’sla’aha’tler esittiriwi. Kelin’ doslar, bu’gingi esittiriwimiz arqali haqiyqiy dosliq haqqinda sa’wbetlesemiz. Dosliq haqqinda xalqimizdin’ arasinda a’jayip bir maqal bar: “Ju’z summin’ bolg’ansha, ju’z dostin’ bolsin” degen. Haqiyqatinda da doslarin’ ko’p bolsa qiyin ku’nin’de de, quwanishli ku’nlerin’de de, ha’mme waqit qasin’da boladi. Sonday waqitta o’zimizdi jalg’iz emes ekeninimizdi ish-ishimizden sezemiz.

Dos degen kim o’zi? Dos degen a’wmetsizlikte, qaran’g’iliqta jiltirap ko’rinetug’in qimbatbahali nur bolip tabiladi. Bir shipaker: “dos, bul ha’mme kesseliklerge qarsi dari” dep aytqan eken. Ha’zirgi da’wirde eger baylig’in’ ko’p bolsa a’tirapin’da doslarin’ da ko’beyedi degen ga’plerdi de arasinda esitip turamiz.

Tilekke qarsi dosliqti bayliq penen o’lsheytug’in adamlar da tabilip turadi. Basin’a awir ku’nler tu’skende a’tirapin’da ko’rinbey qalatug’in doslar da bolip qaladi. Buni haqiyqiy dosliq dep hesh kim aytpaydi dep oylaymiz. Haqiyqiy dos siz benen aqirina shekem birge qaladi. Bir-birewin’izden qa’nshellim uzaqta bolsan’iz da, yamasa ushirasqanin’izg’a ko’p waqit bolg’an bolsa da hesh na’rse dosliq shinjirlarin u’ze almaydi.

Hesh qashan haqiyqiy dosliqti pul yamasa a’wmet penen o’lshey almaymiz. Eger bizler birewdi hu’rmet etsek, og’an isensek ha’m ol adamda ko’plegen jaqsi ta’replerin ko’re alsaq, ol adam menen dos boliwimiz mu’mkin. Birew sizge dos boliw ushin mira’t etse, og’an birinshi bolip qolin’izdi sozin’ dep aytqan bolar edik. Dosliq haqqinda aytqanimizda, Muxaddes Kitaptag’i a’jayip bir misal oyimizg’a keledi.

Ionafan Izrail patshasinin’ uli edi. Sol waqittag’i nizam boyinsha a’kesinen son’ patshaliqti uli aliwi kerek edi. Biraq Quday patshaliqti a’piwayi bir shopan balag’a alip berdi. Biraq sol shopannin’ dosti Ionafan quwanish penen razi boldi. Onin’ ju’reginde dosti Dawitqa qarata hesh qanday ku’nshillik payda bolmadi. Kerisinshe, og’an qarata onin’ ju’reginde quwanish ha’m hu’rmet ja’nede o’sti. Bizlerdin’ pikirimizshe buni haqiyqiy dosliq dep aytsaq boladi.

Eger haqiyqiy doslarimiz bolmasa, dos arttirip, haqiyqiy dos boliwg’a ha’reket eteyik. Doslarimiz ko’p bolsa olar menen doslig’imizdi ja’nede bekkemleyik. Olardi hu’rmet etip, qa’dirleyik, sebebi doslarimiz ko’p bolsa, o’mirde qorqpay aldin’g’a qa’dem basamiz. Haqiyqiy dos bizlerge ha’mme waqit haqiyqatti aytadi ha’m qa’telerimizdi ko’rsetip, o’z waqtinda bizlerdi tuwri jolg’a baslaydi. Dushpan bolsa bulardin’ kerisin qiladi. Qa’dirli doslarimiz, hesh qashan doslarimizdi bayliqqa almastirmayiq.