Assalawma a’leykum hu’rmetli tin’lawshi doslarimiz. Sizler menen ja’ne Danaliq radiosinda ushrasip turg’animizdan ju’da quwanishlimiz. Qa’dirli tuwisqanlar, bu’gin sizler menen ha’mmemiz ushin a’hmiyetli bolg’an tema, yag’niy shan’araq puli haqqinda sa’wbet alip barmaqshimiz.

Shinin ta’n alip aytiwimiz kerek bolg’an na’rse bul – shan’araqtag’i uristin’ kelip shig’iw sebeplerinin’ biri pul ma’selesi bolip tabiladi. Erli zayiptin’ birewi shan’araqtag’i puldi kereginen artiq sawip jiberse u’yge qaytip kelgende u’lken uristin’ kelip shig’iwi aniq. Usi jerde sizlerge bir waqiyani aytip o’tiwdi o’zimizge lazim dep taptiq.

Bir dostimiz pul ma’selesi boyinsha hayali menen tinimsiz urisatug’in edi. Bir ku’ni ku’yewine bir pikir kelipti. Ku’yewi o’zi ushin, al hayali o’zi ushin pul tabiwg’a kelisip, tinish jasawdi kelisipti. Olar ha’zirge shekem ha’r birewi o’zi ushin pul tabadi. Ha’m o’zleri qa’legen na’rsesine qa’legeninshe pullarin sawiwi mu’mkin bolipti. Olar bir-birine pulin’ qa’ne dep soramaymiz dep aytipti. Doslar, bizlerdin’ pikirimizshe bul duris jol emes.

Shan’araqta islep tabilg’an pul bir jerge kelip tu’siwi kerek. Ba’lkim sol shan’araqta da bir ku’ni kelip usi ta’rtip bolip qalar.

Qa’dirli tin’lawshilar, shan’araqta bereket boliwin qa’lesen’iz ha’mme waqit islep tabilg’an pullarin’iz ortag’a alip kelinsin. Tek g’ana kerek bolg’an a’hmiyetli na’rselerdi satip alin’. Puldi ayamay sawiw a’lbette kambag’alliqti da o’zi menen birge alip keledi.

Xalqimizda danaliq penen aytilg’an bir ga’p bar. Az-azdan jep bara berse, tawda kemiriledi. Puldi jo’nsiz sawa bergen shan’araq byudjetinin’ tez tawsilip qaliwina alip keledi. Bizler a’lbette balalarimizdi da jaslig’inan puldi duris sawiwina u’yretiwimiz lazim. En’ ah’miyetlisi puldi qa’dirlewge de u’yretiwimiz kerek. Sonda bizler balalarimizdi pul menen qanday qarim-qatnasta boliwi kerekligin u’yreniwine ja’rdem bergen bolamiz.

Doslar, shan’arag’imiz ushin ha’mme waqit Qudaydan bereket sorawg’a u’yalmayiq. Eger bizler shin kewilden sorasaq, Ol a’melge asiriwg’a tayar. Budan tisqari tapqan pulin’izdan az-maz bolsada u’sir ajiratiwg’a a’detlenin’. Sebebi sol siz miynet etip tapqan pullar da Qudayg’a tiyisli. Ol siz tuwrali qayg’irg’ani ushinda sizge jumis islewin’izge imkaniyat berip atir.

Ha’r sapari ayliq alg’anin’izda Qudayg’a shu’kirshilik bildiriw esin’ziden shiqpasin. Pullarin’izdi reje tiykarinda sariplawg’a a’detlenin’. Eger shan’arag’in’izg’a artiq pullar kirip kelgen bolsa, hesh ekilenbey, oni jiynap shan’arag’in’iz ushin qandayda bir paydali na’rse satip aliwin’iz mu’mkin. Misali kir juwatug’in mashina, yamasa bos waqitin’izda u’yreniwin’iz ushin balalarin’iz ha’m o’zlerin’iz ushin kompyuter satip aliwin’iz mu’mkin. Doslar, pullarin’iz sizdiki, siz oni aldin’g’i esittiriwlerimizde aytqanimizday qa’legenin’izshe sariplawin’iz mu’mkin. Biraq a’lbette danaliq penen.