Doslar, Masixiylik o’mir dawaminda, usi du’nyada jasap atirg’an waqitimizda ko’p tu’rli mashqalalarg’a du’s kelemiz. A’sirese kimlerdir biznes penen shug’illanatug’in bolsa. Geypara waqitlari jalg’an so’ylew yamasa para beriwge tuwra kelip qaladi. Bunday waqitlari neler qiliwimiz kerek? Qanday jol tutsaq duris boladi? Misali, jumis ornin’izda kimdir menen sizdin’ aran’izda mashqala shig’ip qaldi. Ya bolmasa, siz qiliwin’iz kerek bolg’an isti basqa bir kisi joqlig’in’izdan paydalanip, a’melge asirdi. Al na’tiyje bolsa jaman juwmaqlandi.

A’lbette basliq birinshi gezde sizdi shaqirip ha’mme na’rseni sizden talap etedi. Bolg’an isti endi arqag’a qaytariwg’a bolmaydi. Sonin’ ushinda ka’siplesin’izge basqa qaytarmaslig’i haqqinda aytqanda ashiw u’stine minbey tu’sindirgenin’iz maqul boladi. Al qalg’ani menen, menin’ oyimsha basliqtin’ o’zi sheshim qabillawi kerek.

Hu’rmetli tin’lawshi doslar, o’mirde qanday mashqalalarg’a du’s kelsekte ha’mme waqit o’zimiz haqqimizda da oylanip ko’riwimiz lazim. Ba’lkim qanday da bir jerde o’zlerimizdin’ de ayibimiz bar shig’ar. Bul ha’r bir adamnin’ o’zin tinishlandiriwg’a, az bolsada ja’rdem beredi. Joqarida aytip o’tkenimizdey o’mirimizde jalg’an so’ylew kerek bolatug’in waqitlar da tez-tezden ushirasip turadi.

Doslar, bunday waqitlari jalg’an so’ylen’, ya bolmasa so’ylemen’ dep men ayta almayman. Bir o’mirlik misal arqali sizlerge usini tu’sindirip aytip beriwge ha’reket etemen. Bir ibadatxananin’ ag’zalari, tuwisqanlarinin’ u’yinde ekshenbidegi xizmetin o’tkiziw ushin jiynalg’an edi. Aradan biraz waqit o’tip huquq ta’rtip organi xizmetshileri olardi nizamsiz jiynalis o’tkerip atirg’ani ushin ayipladi. Sonda jay iyesi, yag’niy jetekshi-shopan olarg’a qaray bizler hesh qanday jiynalis o’tkerip atirg’animiz joq, bu’gin menin’ u’yimde mereke bolip atir, dep juwap qaytaradi.

Sonda organ xizmetkerleri olardan hesh qanday ayip taba almay artina qaytadi. Biraqta mashqalanin’ en’ u’lkeni endi baslanadi. Sebebi tuwisqanlardin’ biri jetekshi shopang’a qaray, ne ushin siz jalg’an so’ylep, aldadin’iz, negizi bu’gin bizler Qudaydin’ atin alg’islaw ushin jiynalg’an edik, dep aytadi. Doslar, bunday waqitta ne qiliwimiz lazim? Sizlerge tek g’ana bir juwapti aytiwimiz mu’mkin. Oni bolsa da Qudaydan soran’. Tek g’ana Quday A’kemiz ha’r birimizge danaliq penen tuwri joldi ha’m duris sheshim qabil etiwge ja’rdem bere aladi.

Sonin’ menen qa’dirli doslar, bu’gingi esittiriwimiz o’z juwmag’ina jetti. Sizler menen ha’zirshe xoshlasip qalamiz.