Assalawma a’leykum qa’dirli tin’lawshilar. O’mirde adamnin’ basina tu’sken na’rselerdin’ ko’pshiligine onin’ o’zi sebepshi boladi. “Menin’ basima bul na’rsenin’ tu’siwine ol yamasa bul na’rse sebepshi”, dep o’zin aqlaw aqilli ha’m ta’rbiyali adamnin’ isi emes dep oylaymiz. O’mirde qanday qiyinshiliq bolmasin, oni jaqsiliq penen sheshiwge boladi. Adam bul waqiyadan o’zine jaqsi ha’m duris sheshim shig’arip aliwi mu’mkin, Qudaydan ja’rdem sorawi mu’mkin. Geybirewler, o’mirine kelgen qiyinshiliqti Qudaydin’ ja’rdemi menen jen’edi. Oni qabil etip, sol qiyinshiliqlardan Quday menen birge o’tedi. Basqa adamlar bolsa qiyinshiliqti qabil etiwdi qa’lemeydi, Qudayg’a ha’m a’tirapindag’ilarg’a ashiwlanip, Qudaydin’ ma’qsetin tu’siniwdi qa’lemeydi. Solay etip, Qudaydi bile turip tu’skinlikke tu’sedi.
Duris pikirlewdi qa’lemeytug’in adam duris pikirlemeydi eken. Qudaydin’ haqiyqatin biliwge ha’reket etpegen adam oni qabil ete almaydi. So’ytip, iymanliman dep turip, ha’r turli bolmaytug’in islerdi etedi. Usinday adamlarg’a Quday Sardis qalasindag’i ja’ma’a’tke aytqan so’zleri arqali bilay deydi: “…Senin’ islerin’di bilemen. Tiri ja’ma’a’t degen atin’ bar, biraq sen o’lisen’. Sergek bol! Ele o’lmey qalg’an, endi o’leyin dep atirg’anlardi bekkemle. Sebebi Qudayimnin’ aldinda senin’ islerin’nin’ jetkiliksiz ekenligin ko’rdim. Sonliqtan o’zin’ qabil alip esitken ta’limatin’di esin’e tu’sir. Oni tutinip, ta’wbe et! Eger sergek bolmasan’, Men uri siyaqli ku’tilmegende kelemen. Menin’ qashan keletug’inimdi bilmey de qalasan’. Biraq Sardiste, sizlerdin’ aran’izda kiyimlerin kirletpegen ayirim adamlar bar. Olar aq kiyim kiyip, Menin’ menen birge ju’redi. O’ytkeni olar usig’an ilayiqli” (Ayan 3:1-4).
Sardis qalasindag’i ja’ma’a’tti jeke bir adam dep ko’z aldimizg’a keltiremiz. Ol aldin Qudaydi ku’shli qa’lew, quwanish penen qabil etken. Biraq onin’ gu’nag’a beyimliligi Qudaydin’ jolinda arttirg’an jaqsi sapasin da buwip o’ltirip atir. Quday bul adamg’a qarap “sergek bol”, deydi. Ol
adam ruwxiy o’lik tu’rde. Ol derlik ruwxiy o’mirde jasamaydi. Biraq ele pu’tkilley joq bolip ketpegen. Qudayg’a maqul bolatug’in jaqsi sapalari da bar. Bunday sapalari haqqinda Quday bilay deydi: “O’liwge ju’z tutpag’an ne na’rsen’ qalg’an bolsa, bekkemlep al”. Budan tisqari onin’ isleri pitpegen. Qudaydin’ jolinda baslag’an isleri shala qalip ketken. Quday onin’ usi islerin pitirip qoyiwin qa’leydi.
Quday ruwxiy o’mirde jasamaytug’in adamlarg’a da imka’n beredi. Olardin’ sergek boliwina, jaqsi islerin, sapalarin tiklewge. Qudaydin’ jolinda bir waqitlari baslag’an islerin pitiriwge imka’n beredi. Ol bunday adamlardi aldin ala ko’p eskertedi. Ol ha’zir de Muxaddes Kitap O’zinin’ So’zi arqali bizlerge “Sergek bol”, dep atir. Eger sergek bolmasan’, Men uri siyaqli bastirip Kelemen, sen bolsa qaysi waqit seni basip aliwimdi bilmey qalasan’” dep aytip atir. (Ayan 3:3). Eger Qudaydan esitken ha’m qabil etken na’rselerimizdi aldin’g’i jag’dayina keltire alsaq, o’lim ku’tip aitrg’an jaqsi sapalarimizdi tikley alsaq, ishimizde jasap atirg’an jawizliqqa qarsi tura alsaq, Quday bizlerge bilay deydi: “Jen’ip shiqqan usinday aq kiyim kiyedi. Bunday adamnin’ atin O’mir kitabinan hesh qashan o’shirmeymen. A’kemnin’ ha’m Onin’ perishtelerinin’ aldinda bul adamnin’ atin ashiq ta’n alaman” (Ayan 3:5).
