Assalawma a’leykum hu’rmetli doslar. Efirde sizler ushin berilip atirg’an esittiriwimizdin’ biri. Bu’gingi esittiriwimiz ha’mmemizdin’ o’mirimizde en’ za’rur ha’m kerekli bolg’an den-sawlig’imizg’a bag’ishlanadi. Ba’rshemizge belgili bolg’aninday insan qa’nshellim bay bolmasin, onin’ qolinda ha’mme na’rseni a’melge asiratug’in imkaniyatlardin’ boliwina qaramastan, eger den-sawlig’i durisli bolmasa – ha’mmesinin’ paydasi joq.

Sonin’ ushin bolsa kerek ha’r bir insan sa’l kesel bolsa da’rixanag’a ya bolmasa shipakerdin’ aldina ju’giredi. Egerde shipakerler uliwma emley almaytu’g’in ya bolmasa jaqin arada bul du’nya menen xoshlasatug’inlig’i haqqinda aytsa uliwma kewli buzilip, tu’skinlikke tu’sedi.

Kerek bolsa en’ jaqinlarimizg’a da jaqsi so’zlerdi aytiw ushin ku’sh taba almay qalamiz. Xalqimizda bir ga’p bar: “Da’rdin bergen Quday, shipasin da beredi” – deydi. Bul ga’ptin’ astarinda jan bar. Eger insan haqiyqattanda Qudaydan u’mit etip, Onnan barliq islegen gu’nalari ushin keshirim sorap ta’wbe etip, da’rtine shipa sorasa, Quday ol adamdi esitedi. Sebebi Quday ha’r bir insan haqqinda qayg’iradi. Onin’ ta’shwishleri ha’m turmisi ushin da qayg’iradi. Quday ha’r birimizdin’ keselliklerimiz ha’m gu’nalarimiz ushin Iysa Masiyxti o’limge jiberdi. Iyemiz bolsa, atanaq-ag’ashta turip ha’r bir la’nnetlewler menen keselliklerdi o’z moynina aldi, sonin’ ushinda Ol atanaq ag’ashta azap shegip o’ldi.

Tuwri, bizlerdin’ o’mirimizde shipakerler de u’lken oring’a iye. Sebebi Qudayimiz ha’r birimiz ushin aqil menen danaliq bergen. Sol sebepten de ko’pshiligimiz tez-tezden shipakerler ko’riginen o’tip turamiz. Geypara waqitlari ayirim keselliklerdin’ payda boliwinda insannin’ o’zi de sebepshi boladi ha’m shipa almag’anlig’inda Qudaydi ayiplaydi. Misali Quday insang’a ha’r qiyli ziyanli na’rselerdi paydalaniwg’a inkar etken bolsa, ya bolmasa a’piwaylastirip aytqanda temeki shegiw denemiz qurilisi ushin ziyan ekenligin jaqsi bilemiz. A’qibetinde qandayda bir keselikke shaling’animizda da’rtimizge shipa bermey atirg’aninda Qudaydi ayiplaymiz. Bizlerdin’ ha’r birimiz denemizge bile turip ziyan keltirmewimiz kerek, ha’m en’ baslisi bul iste hesh kimdi ayiplamawimiz da kerek.

Muxaddes Kitapta jazilg’aninday insannin’ denesi bul bir Muxaddes orin. Sonday eken qalayinsha bizler Muxaddes denemizge ziyan keltiriwimiz yamasa bile turip buziwg’a urinamiz. Sonin’ ushinda Qudaydin’ bizlerge bergen muxaddes denemisti asrap abaylawimiz lazim. Sonda g’ana Quday da ha’r bir insandi asirap abaylaydi. Hu’rmetli Danaliq radiosi tin’lawshilari, tez-tezden shipakerler ko’riginen o’tip o’z den-sawlig’in’izg’a g’amhorliq etin’. Eger sizde yamasa birde-bir jaqinin’izda qatti awiriw bolsa, Qudaydan usi da’rt ushin shipa soran’. Quday ha’mme waqit ibadat etiwshinin’ duwasin esitpey turmaydi. Doslar, sizler menen xoshlasar ekenbiz, hesh qashan kesel bolmag’aysiz dep qalmaqshimiz. Qudayimiz barqulla ha’r birimizdi O’zinin’ panasinda asirap-abaylasin. Xosh saw-salamat bolin’lar.