Assalawma a’leykum qa’dirli doslar. Sizler menen ja’ne radio tolqinlari arqali ushrasip turg’animnan ju’da’ minnetdermen. Mikrofon aldinda ja’ne men Sarbinaz, sizler menen birge bolaman. Bu’gingi esittiriwimizdi bir soraw menen baslaymiz. Jaratqan Iyemiz bizlerdin’ quwanishli boliwimizdi qa’leyme yamasa qa’lemeyme? Bul sorawimizg’a ko’p iseniwshi tuwisqanlarimizdan awa degen juwapti esitkenbiz.
Bul juwap naduris emes dep oylaymiz. Bul sorawimizg’a yaq dep juwap beretug’inlar, olar menimshe Jaratqan Iyemiz haqqindag’i bazi bir haqiyqatlardi axirina shekem bilmegenlikleri ushin bolsa kerek. Filiplilerge jazilg’an xattin’ 4:4 ayatinda bilay jazilg’an: “Iyemiz benen qatnasta bolip, ba’rqulla quwanin’lar. Ta’krarlap aytaman: quwanin’lar!” A’lbette Jaratqan Iyemiz quwanish ta’repdari. Sebebi Quday A’kemiz shaytandi jen’ip shiqqan.
Bizler masiyxiy adamlar ushin Iysa Masiyx O’zinin’ muxaddes qanin to’gip, ha’r birimizdi gu’nanin’ azabinan azat etti. Ne ushin qapa boliwimiz kerek? Iyemiz Iysa qayg’ig’a tu’sip ta’shwishlenbegen, ha’m Ol bizlerge eger Onin’ izinen ersek quwanishqa iye boliwimizdi aytqan. Beyish bul ha’mme waqit quwanishqa tola jer ekenligi haqqinda ha’m aytadi.
Biraq bazi bir gu’nali isler ha’m adamg’a quwanish alip keliwi mu’mkin. Biraq bunday quwanish ko’pke barmaydi. Sebebi aqir a’qibet ol adamdi o’limge alip bariwi aniq. Bul ashig’an jaqsi awqatti bilmey turip jep qoyg’ang’a uqsaydi desekte boladi. Sebebi bunday awqatti jegen adam, a’lbette o’zin jaman sezip awirip qaladi.
Birgezleri bul o’limgede alip kelewi mu’mkin. Ha’r birimizge Jaratqan Iyemiz gu’na islemewimiz haqqinda ko’plegen ma’rte eskerttirip aytadi. Sebebi gu’na’nin’ aqiri ha’mme waqit jaman tawsiladi. Jaratqan Iyemiz bolsa bizlerdin’ ha’mme waqit quwanishqa toliwimizdi ha’m en’ a’hmiyetlisi taza o’mir su’riwimizdi qa’leydi. Doslarim, eger o’mirimizdi Onin’ qollarina isenip tapsirsaq, demek A’kemiz Qudayg’a toliq isene aliwimiz mu’mkin. Ol ha’r birimizdi ayip ha’m gu’nasiz, O’zinin’ beyishine alip baradi.
Jaratqan Iyemiz O’zinin’ ha’r bir perzentinin’ kimligin ha’m qanday ekenligin jaqsi biledi. Ha’r birimiz ushin O’zinin’ quwanishin beriwdi qa’leydi. Bul quwanish sheksiz dawam etedi. Qudaydi bilgen adamlarday basqa hesh kim quwana almaydi.
Yuxanna kitabinin’ 15:11 ayatinda bilay jazilg’an: “Menin’ quwanishim sizlerge o’tsin ha’m ju’reklerin’iz quwanishqa tolsin…”. Hu’rmetli radio tin’lawshilar, sizlerge tilegimiz, o’mirimizde quwg’in bolsada, ta’shwishler bolsada, ba’ribir quwanishqa tola bolayiq. Sebebi Jaratqan Iyemiz bizlerdi jaqsi ko’rgeni ushin bul ta’shwishler arqali bizlerdi O’zine jaqinlastiriwdi qa’leydi. Doslar, quwanish hesh qashan, hesh kimdi jalg’izlatip qoymasin. Xosh saw-salamat bolin’.
