“Jaratqan Iye xalqina kewli toladi, Kishipeyillilerge jen’is berip, olardi dan’qqa bo’leydi”. Zabur 149:4

Bizler du’nyag’a kelgen waqtimizdan baslap, Quday ko’rinbes gu’wa bolip, bizlerge ku’lip qarag’an. Bizlerdin’ du’nyag’a keligenimiz ushin Onin’ kewli qatti tolg’an. Qudaydin’ ra’ha’tleniwi ha’m kewli toliwi ushin jasawimiz bizlerdin’ o’mirdegi en’ birinshi ma’qsetimiz sanaladi. Bul haqiyqatti tu’sinip jetkenimizde hesh qashan o’zlerimizdi kereksiz etip sezbeymiz. Bizler Qudaydin’ perzentlerimiz ha’m bizler Qudaydin’ jaratilg’anlarinin’ ishinde en’ qa’dirli balalarimiz. Hesh na’rse bizlerdey Qudayg’a ra’ha’t ha’m quwanish a’kelmeydi.

Bizler Qudayg’a duwa etip, Onin’ So’zin tin’lap yamasa Og’an alg’islar aytip, Og’an la’zzet bag’ishlawimiz mu’mkin. Biraq bular toliq boysiniw ushin jeterli emes. Boysiniw bul o’mir jolimiz. Bizler o’zlerimizdin’ paydamizdi oylap boysinbayiq. Bul naduris. Boysing’an waqtimizda Qudayg’a ra’ha’t ha’m quwanish bag’ishlawg’a ha’reket eteyik.

Boysiniw ol o’mirimizdin’ bir bo’legi emes, al pu’tkil o’miriz degendi an’latadi. Boysiniw tek g’ana ja’ma’a’tte xizmet etiw degeni emes. Quday bizlerge Og’an ha’mme waqit boysiniwimizdi buyirg’an. Bizler Qudaydin’ So’zlerine boysiniwdi, ha’r bir oylag’an oyimizda, is ha’reketimizde, so’ylegen so’zimizde, adamlar menen qarim-qatnasimizda, alg’is maqtawlarimizda da ko’rsetiwimiz mu’mkin. Bulardan Quday A’kemiz ju’da la’zzetlenedi. Azanda u’yqidan turg’annan tap keshqurin u’yqig’a ketemen degenshe Qudaydin’ So’zi menen jasawg’a tirisayiq. Dawit patsha bilay degen edi: “Men Qudayg’a ha’mme waqit minnetdarshiliq bildiremen, menin’ tilim ha’mme waqit Oni alg’islaydi”.

Ha’mme na’rseni Qudaydin’ Atin alg’islaw ushin qiliwdin’ ila’ji barma? A’lbette, ila’ji bar. Eger bizler qilip atirg’an islerimizdi Iysa ushin qilip atirman dep oylasaq ha’m ha’mme waqit Ol menen qatnasta bolsaq. Kolosalilarg’a 3:17 ayatta: “So’zin’iz yamasa isin’iz benen qilg’an ha’r bir na’rseni Iyemiz Iysanin’ ati ushin, Ol arqali A’kemiz Qudayg’a shu’kirlik etip islen’ler” – dep jazilg’an. Eger bizler ha’r bir qilip atirg’an islerimizdi Qudayg’a bag’ishlasaq ha’m Onin’ aldinda xizmetimizdi diqqat penen qilsaq qilip atirg’an isimiz benen Qudaydi alg’islag’an bolamiz.

Eger bir jigit bir qizdi qatti su’yip qalsa, ha’mme waqit ol haqqinda oylaydi. Azanda turg’anda, awqatlang’anda, ku’n boyi oni tinimsiz oylap ju’redi. Iysani da tap solay etip su’ysen’iz, Ol haqqinda tinimsiz oylaysiz. Solay etip Qudayg’a boysinasiz. Bul hesh qiyin emes, solay emes pe?

Doslar, kelin’, bu’gingi ku’nimizdi basqasha etip baslaymiz. Qudayg’a boysinip, Og’an alg’islar keltirip jasaymiz!