Assalawma a’leykum doslar. Bu’gin a’tirapimizda ko’plegen adamlar, men tuwri ha’m duris joldan baratirman, ha’zir o’zim ju’rgen jol haqqinda bilgenlerim jeterli. Odan artig’in biliwim sha’rt emes, dep aytqanlarin esitemiz. Eger siz de usinday dep oylasan’iz, onda Sulayman payg’ambardin’ so’zlerin bir tin’lap ko’rin’: “Sonday jol bar, adamg’a duris bolip ko’riner, biraq a’qibeti, o’limge alip barar”. Zaburda Sulayman payg’ambardin’ a’kesi Dawit payg’ambar bilay degen edi: “Quday aspannan qarap adamzatqa, bar ma eken aqilli ha’m Meni izleytug’in, dep. Ha’mmesi joldan azg’irilg’an, birdey buzilg’an. Jaqsiliq qilatug’in hesh kim joq. Birde birewi joq!”. Zabur 52:3

Eger Quday O’zi bizlerge duris joldi ko’rsetpese, bizler tap bazarda jog’alip qalg’an kishkene baladay, o’zlerimiz Og’an joldi tawip bara almaymiz. Sonin’ ushin da Quday Muxaddes Kitap arqali bizlerge tek g’ana bir na’rseni – Qudayg’a bariwdin’ jolin ko’rsetedi.

Doslar, sizlerge en’ a’hmiyetli na’rseni aytip o’tpekshimiz. Bul du’nyada insan ushin qutqariliw jolin tabiwdan basqa ulli jol joq. Bizlerdi tin’lap barsan’iz, Qudaydin’ qutqariliw joli haqqinda ko’birek bilip alasiz. Siz Quday Nux ha’m onin’ shan’arag’i suw tasqini ba’lesinen qutqarilg’anin, Ibrayim payg’ambarg’a perzent bergenin ha’m Yunus payg’ambardi kittin’ qarninan aman alip shiqqani haqqindag’i waqiyalardi bilesiz be?

Eger solay bolsa, Quday ne ma’qsette bul islerdi etkenin, aniqrag’i, Quday pu’tkil adamzatti qutqariw ushin bolg’an rejesin a’melge asiriw ushin etkenin jaqsi tu’sinesiz. Bir neshe min’ jillar aldin Ayup payg’ambar bilay degen edi: “Insan o’zin o’zi qalay pa’kley aladi?” Insan o’zi etken gu’nalarin juwa almaydi. Bizler ha’r birewimiz Qudaydin’ aldinda juwap beremiz. Quday ushin jasirin hesh bir na’rse joq. Ol ha’mme na’rseni, sirlarimizdi ha’m ju’reklerimizdegi sezimlerimizdi de jaqsi biledi. Ol insan o’zin o’zi qutqara almaytug’inlig’in da jaqsi biledi.

Sonin’ ushin Onin’ o’zi qutqariliw jolin ko’rsetiw ushin ata-babalarimizg’a O’zi jibergen payg’ambarlar arqali so’ylegen. Ko’z aldin’izg’a keltirip ko’rin a, doslar, eger sizge prezident o’zinin’ xabarshilari arqali bir xat jiberse, siz bul xatti aship oqimaysiz ba? A’lbette, oqiysiz. Qudaydin’ Muxaddes So’zi arqali so’ylewi Qudaydin’ adamlarg’a so’ylewinin’ joli bolip tabiladi. Muxaddes Kitapta jazilg’an ha’r bir so’z ha’m ha’r bir payg’ambarshiliq adamlar qa’lewi menen emes, Qudaydin’ basqariwi menen jazilg’an. Quday O’zi tan’lag’an payg’ambarlardi Muxaddes Ruwx penen ruwxlantirip, Onin’ so’zlerin jaziwg’a u’ndedi. Ne ushin onday qildi. Sebebi jer ju’zindegi adamlardin’ ha’mmesi ha’m onin’ a’wladlari da Onin’ qutqariliw jolinan xabardar boliwin qa’legen. Geybirewler, “Bu’ring’i payg’ambarlar Quday haqqinda aytqan so’zleri buring’i zamanda qalip ketken. Bulardin’ hesh birewi bizlerge tiyisli emes”- dep aytiwi mu’mkin.

Biraq Muxaddes Kitapta jaziliwinsha, Qudaydin’ So’zinde jazilg’an ha’r bir is orinlanbag’ansha odan ya bir ha’rip, ya bir noqat o’shpeydi. Bul Qudaydin’ aytqanlari ha’m bul a’lbette usinday boladi. Sonin’ ushin, Tawrat kitabinin’ en’ kishi bo’limin de basqalarg’a buzip u’yretkenler Qudaydin’ aldinda juwap beredi. Muxaddes Kitap bilay deydi: “Solay etip, kim de kim usi buyriqlardin’ en’ kishi birewin buzip, adamlarg’a da solay u’yretse, ol Aspan Patshalig’inda en’ kishi bolip sanaladi”. Ja’ne bilay deyilgen: “Burin Muxaddes Jaziwlarda aytilg’anlardin’ ha’mmesi de bizlerge ta’lim beriw ushin jazilg’an”.

“Muxaddes Jaziwlardin’ ha’mmesi Qudaydin’ Muxaddes Ruwxinin’ ilhami menen jazilg’an bolip, ta’lim beriw, a’shkaralaw, du’zetiw ha’m haqiyqatliq boyinsha ta’rbiyalaw ushin paydali”. Du’nyanin’ aqirina shekem bizlerdin’ jolimizdi jaritip turatug’in bul Qudaydin’ So’zi duris ha’m tuwri joldi ko’rsetiw ushin. Qudaydin’ haqiyqati insan so’zleri menen joq bolmaydi yamasa o’zgermeydi. Biraq onin’ so’zi adamlardi o’zgertiwge qadir.