Assalawma a’leykum qa’dirli tin’lawshi doslarimiz. Sizler menen ja’ne ushrasip turg’animizdan quwanishlimiz. Qa’dirli doslar, rastin aytsam Qudaydin’ adamzatti sonshellim su’yetug’inlig’ina men elege shekem hayran qalaman. O’zlerin’iz oylap qaran’, eger perzentin’iz basqa adamlardin’ aldinda sizdi qatti u’yaltirip qoysa, ne qilg’an bolar edin’iz?
A’lbette ashiwin’iz keledi, jazalaysiz. Biraq ba’ribir ol sizdin’ perzentin’iz. Sonin’ ushin ha’m ol qanday jaman is qilip qoysada odan bas tartip kete almaysiz. Perzent aradan waqit o’tsede sol isin ja’ne qaytalap ha’m qoyadi. Adamzat Qudayg’a qarsi qansha isler qilsada, Jaratqan Iyemiz de bizlerdi kemshiliklerimizge qaramay ha’r birewimizdi ayriqsha su’yedi.
Ha’zir ha’m Jaratqan Iyemiz bizlerdi su’yiwde dawam etpekte. Adamzat Qudaydin’ aytqanlarin qilmag’ani ha’m Oni tin’lamag’ani ushin Shaytannin’ qullilig’ina tu’sip qala beredi. Jaratqan Iyemiz Shaytannin’ qullilig’inan qutqariw ushin O’zinin’ rejesin a’melge asiriwg’a kiristi. Shaytannan bizlerdi qaytarip aliwi ushin Ol u’lken to’lem to’lewi kerek boldi. Quday “Usi jer ju’zindegi barliq adamlar ushin O’zimnin’ jalg’iz Ulimdi qurban qilaman, Ol olar ushin o’ledi ha’m qayta tiriledi” dedi. Tap Qudaydin’ aytqaninday boldi.
Iyemiz Iysa atanaq ag’ashta azapli o’limdi O’zinin’ denesinen o’tkerdi. Ol o’ldi ha’m u’sh ku’nnen keyin qayta tirildi. Biraq negedur adamlar bul o’limdi olardin’ qutqariliwi ushin bolg’anin oylap ha’m ko’rmey atir. Ha’zirge shekem Shaytannin’ qullilig’i astinda jasap kelmekte. Jaratqan Iyemiz bizlerdin’ qutqariliwimiz ushin basqa hesh na’rse ko’rmedi. Biraq sonda da adamzattin’ qutqariliwi ushin O’zinin’ jalg’iz Ulinan bas keshti. Oni atanaq ag’ashqa aparip ayaq qollarin shegeledi. Qudaydin’ su’yispenshiligi haqiyqiy ha’m arziytug’in su’yispenshilik. Quday bizlerdin’ Ol menen tig’iz qarim-qatnasta boliwimizdi ju’da qa’leydi. Qa’dirli doslarim, Jaratqan Iyemiz bizler ushin qatti ha’reket etip bizlerdi qutqardi. Bizler Og’an qanday minnerdershilik bildirsek boladi? A’lbette a’welem bar haqiyqiy masiyxiy o’mirimizdi, Quday ushin jasap atirg’an o’mirimiz arqali Og’an minnerdershilik bildirsek boladi.
En’ a’hmiyetlisi Ol menen birge jasap Onin’ atin alg’islawimiz. Sonin’ menen qa’dirli tin’lawshilar esittiriwimiz o’z juwmag’ina jetti, sizler menen ja’ne ushrasqansha saw aman bolin’.
