Doslar, masixiy o’mirimizde ha’r birewimizde qashan bolmasin u’lken yamasa kishkene mashqalalar boliwi aniq. Usi mashqalalar o’mirimizdin’ ha’r qiyli da’wirlerinde boliwi mu’mkin. Bizler insan bolg’animiz ushin da qashan ha’m qaysi waqitta ne boliwin aldinnan bile almaymiz. Misali, shan’araqta mashqalalar boliwi yamasa perzentlerimizdin’ bizlerdi tin’lamawi, ja’ne en’ jaqin adamlarimizdin’ du’nyadan ko’z jumiwi da masixiy o’mirimizge o’zinin’ jaman ta’sirin o’tiriwi mu’mkin.

Ko’plegen ma’mleketlerde shan’araq basshisinin’ o’z jumisinan ayiriliwi da u’lken mashqalalardin’ biri bolip tabiladi. Budan tisqari, eger denemizde qanday da dawasiz kesellik bar ekenin aniqlasaq, ja’nede ruwxiy tu’skinlikke tu’semiz. Usinday ku’tilmegende bolatug’in qayg’ili waqiyalar o’zinin’ jaman ta’sirin a’lbette adamlarg’a o’tiredi. Biraq tiykarg’i isimiz bul bizler usi qayg’ili ha’m jag’imsiz waqiyalarg’a berilip qalmawimiz lazim. Quday biz insanlardi yag’niy O’z perzentlerin awir ku’nlerde de hesh qashan taslap ketpeytug’inin yadimizdan shig’armawimiz kerek.

Bizlerden pu’tkil du’nya, jaqinlarimiz ju’z buriwi mu’mkin, biraq Quday bizlerdi bir minutqa bolsa da qiyin, awir waqitlarda hesh taslap ketpeydi. Doslar, eger kimnin’dir awir mashqalalari bar ekenligin bilsen’iz, olarg’a ja’rdem beriwge ha’reket etin’. Bir awiz jag’imli so’zin’izdi tuwisqanin’izdan ayaman’. Ba’lkim sol tanisin’iz ya bolmasa tuwisqanin’iz o’mirin ele Masiyxqa tapsirmag’an boliwi da mu’mkin. Doslar, kelin’, ja’rdemimizdi olardan da ayamayiq. Bir awiz jaqsi so’z adamdi u’lken gu’na etiwden ha’m ko’plegen mashqalalardan qutqarip qaliwi mu’mkin.

Jaqin tuwisqanlarimizdin’ mashqalalarina o’zimizdin’ mashqalalarimizday etip qarasaq, olarg’a ja’rdem qolin soziw ja’nede an’satraq boladi. Ha’tteki, sol tuwisqan ushin ibadat etiwin’iz arqali, onin’ o’mirinde u’lken o’zgerisler qila aliwina isene aliwin’iz kerek. Hu’rmetli Danaliq radiosi tin’lawshilari, bir-birimiz ushin barqulla ibadat eteyik. Sonda Quday ha’mmemizdi ja’nede bereketlep, jarilqaydi. Doslar, mashqalalarin’izdi ha’mme waqit Qudayg’a tapsiriwg’a u’yrenin’. Bizlerdin’ dushpanimiz u’stimizden jen’ip shig’iwina jol qoymayiq. Quday menen barqulla jen’ip shig’iwimiz aniq.