Siz tosattan payda bolmag’ansiz.

Sizdin’ tuwiliwin’iz ta’biyattin’ qa’tesi yamasa tosattan bolmag’an. Ba’lkim ata-anan’iz sizdin’ tuwiliwin’izdi rejelestirmegen shig’ar. Biraq Quday a’lbette rejelestirgen. Siz ele anan’izdin’ qarninda payda bolmasin’izdan aldin, Qudaydin’ oyinda payda bolg’ansiz. Sizdin’ ha’zir bul du’nyada ekenligin’iz, dem alip turg’anin’iz, tag’dir da, imkaniyat da, a’wmet te, emes. Quday sizdi jaratiwdi qa’legeni ushin tirisiz.

Quday denen’izdin’ ha’r bir bo’legin aldinnan aniqlastirip qoyg’an. Quday sizdin’ jinsin’izdi, terin’izdi, shashin’izdin’ ren’in, ha’m ju’z betin’izdin’ du’zilisin de aldinnan bilgen ha’m O’zi olardi birme-bir belgilegen. Ol sizge jeke adam sipatinda qa’biliyet bergen. Dawit patsha, Zabur kitabinda bilay degen:

“Jasirin jerde jaratilg’animda, jerdin’ tu’binde do’retilgenimde, su’yeklerim Sennen jasirin emes edi. Qursaqqa tu’sken waqtimnan-aq meni Senin’ ko’zlerin’ ko’rdi. Mag’an ajiratilg’an ku’nlerdin’ ele hesh biri kelmesten burin, ha’mmesi Senin’ kitabin’da jazilg’an edi”.

Quday sizdi jaratiwdan ma’qseti bar edi. Ol sizdin’ qashan tuwiliwin’izdi ha’m qansha o’mir jasawin’izdi da belgilen. Ol ha’tteki sizdin’ qay jerde tuwilin’izdi da rejelestirgen. Ol sizdin’ milletin’izdi de belgilegen.

En’ qizi Ol sizdin’ qanday shan’araqta du’nyag’a keliwin’izdi de rejelestirgen. Ko’plegen balalar ata-analari ushin tosattan payda bolg’an bolsa, al Quday olardin’ tuwiliwin, sol shan’araqqa keliwin aldinnan bilgen. Quday hesh qashan tosattan bolg’an na’rselerdi, islerdi qilmaydi. Quday hesh qashan qa’telespeydi. Ol ne jaratqan bolsa da, ha’mmesin qanday da bir sebepke ko’re jaratqan.

Doslar, bilesiz be, Quday ha’tteki du’nyani jaratpasinan burin siz haqqin’izda oylag’an eken. Sonin’ ushin da sizdi jaratqan. Ol planetamizdi ha’m ondag’i barliq na’rselerdi usi jerde jasawin’iz ushin jaratti.

Ne ushin Quday sonsha ta’shwishke iye, planetamizdi ha’m ondag’i barliqti jaratti? Sebebi Ol su’yiwshi Quday. Bul tu’rdegi su’yispenshilikti o’lshep bolmaydi biraq ol ju’da sadiq. Siz Qudaydin’ su’yispenshiliginin’ a’hmiyetli obyekti etip jaratilg’ansiz. Ol sizdi su’yiw ushin jaratqan. Ol sizge su’yispenshiligin ko’rsetiw ushin sizdi jaratti. Eger Quday bilmegeninde edi, bizlerdin’ ha’mmemiz tosattan jaratilg’an bolip qalar edik. Biraq Qudayg’a shu’kir bul onday emes.

Quday ha’r birewimizge bilay deydi: “Sen tuwilg’anin’nan beri seni ko’terip ju’rippen. Tuwilg’anin’nan beri sag’an g’amxorliq etemen. Ha’tteki, qartaysan’ da Men sag’an bolg’an mu’na’sa’betimdi o’zgertpeymen. Shashlarin’ ag’arsada, sag’an g’amxorliq ete beremen, Men seni jarattim ha’m seni su’yiwde toqtamayman”.