Assalawma a’leykum qa’dirli doslar. Qarim-qatnaslar, gozzal sa’wbetler, kewilden aytilg’an jilli so’zler adamnin’ jag’dayin jen’illetedi. A’sirese, Quday menen qarim-qatnas ha’m Ol menen ha’r ku’ni sa’wbetlesiw bizlerdi Og’an jaqinlastiradi. Quday aldin O’z xalqina payg’ambarlar, patshalar ha’m ruwxaniyler arqali so’ylewdi hesh toqtatpag’an. Al Jan’a Kelisim da’wirinde Ol Iysa Masiyx arqali so’yledi.

Bir ku’ni Iysa Masiyxtin’ sha’kirti Filip bilay dedi: “Iyem, bizlerge A’keni ko’rset, bizlerge sonin’ o’zi jetkilikli, – dedi” (Yuxan 14:8). Doslar, onin’ bul ga’pine Iysa ne dep juwap bergenin bilesiz be? Ol bilay dedi: “Filip, Men sonsha waqittan beri sizler menen birge bolsam da, Meni ele bilmeysen’ be? Meni ko’rgen A’keni ko’rgen boladi” (Yuxan 14:9).

Quday Iysanin’ sha’kirtlerine de so’yledi. Geybirewlerine Muxaddes Ruwx arqali, geybirewlerge ayanlar arqali. Solay etip, ha’zir, bu’gin ne? Bu’gin de Quday O’zinin’ perzentlerine so’yley me? Quday O’zinin’ isinde qatnasiwimiz ushin bizlerge O’zinin’ qa’lewin ko’rsete me? A’lbette, ko’rsetedi. Ol o’zgermegen. Ol ele de O’zinin’ xalqina so’yleydi. Bizlerdin’ ma’sele bul, bizler iseniwshiler negedur Qudaydin’ bizlerge so’ylep atirg’anin ko’rmeymiz, ha’m sezbeymiz. Ne ushin bunday doslar?

Gu’na bizlerdin’ ko’zlerimizdi ha’m oylarimizdi sol da’rejede jawip taslag’anliqtan, Qudaydin’ haqiyqatin Muxaddes Ruwx aship bergenshe tu’sine almaymiz. Muxaddes Ruwx Ol bizlerdin’ mug’allimimiz. Ol bizlerge Qudaydin’ So’zin u’yretip atirg’aninda, Onin’ qasinda otirip, Oni tin’layiq. Ibadat etip atirg’animizda, Muxaddes Ruwx u’yrengenlerimizge qarata ju’regimizdi qalay ku’shke toltirip atirg’anin baqlayiq. Quday ha’r bir adamg’a Muxaddes Ruwx, Muxaddes So’zi, ja’ma’a’ti ha’m tuwisqanlarimiz arqali so’yleydi.

Qudaydin’ So’zin u’yrenip atirg’animizda, ju’da itibarli bolayiq. Ha’r bir ayatti bizlerge jazilg’anday etip qabil etiwdi u’yreneyik. Quday bizlerge So’zi arqali so’ylewdi qa’lese, Quday sol ayat arqali bizlerge so’ylep atig’anina gu’manimiz qalmaydi.

Ha’zirgi ku’ndegi iseniwshilerdin’ qa’teleri birdey. Bizler jag’daylar arqali Qudaydin’ so’zin esitejaq bolamiz. Geyde “Qudayim, men mna isti qilmaqshiman, eger Senin’ erkin’ bolmasa, iltimas meni toqtat”, – dep aytamiz. Bu’ytip aytiw an’sat. Eger mabada isimiz jaqsi shiqpasa Qudaydi ayiplaymiz. “Senin’ erkin’ emes eken, ne ushin meni toqtatpadin’” – dep aytamiz. Yamasa geybirewler Muxaddes Kitaptin’ du’s kelgen jerin aship, oqip, “Menin’ ha’zirgi jag’dayima mna ayat duris keledi” – dep aytadi. Doslar, bul da naduris eken.

Gedeon esin’izde me? Ol Quday og’an so’ylep atirg’anin biliw ushin Qudaydin’ perishtesin ko’p ma’rte sinap ko’rgen. A’lbette, sol waqitta Quday sabirli boldi, biraq bunday qilip bizlerdin’ sinawimiz bul Qudayg’a bolg’an isenimsizligimiz esaplanadi. Iysa Masiyxtin’ da’wirinde alimlar Odan: “Seni Qudaydin’ jibergenligin da’lilleytug’in ka’ramatli belgi ko’rset!” – dep aytqani esin’izde me? Doslar, Iysa olarg’a ne dep juwap bergen edi? “Bul jaman ha’m opasiz a’wlad ka’ramatli belgi talap etpekte…” (Matta 12:39). Qudaydin’ dawisin esitiw ushin hesh qanday formula yamasa qag’iyda berilmegen.

Bunin’ ushin Onin’ menen jaqin qarim-qatnasta bolsaq jeterli. Qa’dirli tin’lawshi doslarimiz bul haqqinda ja’nede ko’birek biliwdi qa’lesen’iz, bizlerdin’ danaliq.com saytimizg’a sizlerdi shin ju’regimizden mira’a’t etemiz. Keyingi sa’wbetlerimizdi o’tirip jibermen’.