Assalawma a’leykum hu’rmetli Danaliq radiosi tin’lawshilari. Sizler menen efir arqali ushrasip turg’animizdan ju’da quwanishlimiz. Kelin’, hu’rmetli tin’lawshilar, bu’gin sizler menen birge Muxaddes Kitaptag’i jaziwlardi u’yreniwge ha’reket etemiz. Aspandag’i Quday A’kemiz O’zinin’ So’zine barqulla sadiq. Sebebi Quday gu’nani jazalaydi. Sog’an qaramastan Quday muhabbat Qudayi. Bizler buni hesh qashan umitpawimiz lazim. “Ol hesh kimnin’ nabit boliwin qa’lemeydi, ha’mme ta’wbe etsin dep sabirliliq penen ku’tip turipti.”

Ekinshi Petr kitabinin’ 3 babi 9 ayati usi haqqinda da aytadi. Ol gu’nakarg’a O’zinin’ miyrim-sha’pa’a’tin ko’rsetpekshi. Bul haqqinda Efeslilerge jazilg’an xattin’ ekinshi babi to’rtinshi ayatinda aytip o’tken. Ol buni qalay qiladi? Dep oylaymiz. Muxaddes Quday bilay deydi: “Biraq, miyrim-sha’pa’atke bay bolg’an Quday bizlerdi sonshelli su’ygenlikten, gu’nalarimiz sebepli o’li bolsaq ta, bizlerdi Masiyx penen birge tiriltti. Sizler Onin’ miyrimi menen qutqarildin’iz”. Quday muxaddes, ha’m Ol gu’nani jaman ko’redi.

Biraq Quday Ol su’yispenshilik, gu’nakardi su’yedi. Ol qalay gu’nakardi qutqarip, bir waqittin’ o’zinde a’dil ha’m muxaddes ha’reket qila aladi, dep oylap atirg’an shig’arsiz. Qudaydin’ muxaddesligi ha’m pa’kligi tek g’ana gu’nasiz, minsiz adamlardi O’zinin’ pashalig’ina kire aladi, dep aytadi. Gu’nakarlar bolsa o’lim jazasina hu’kim etiliwi tiyis. Doslar, bir na’rseni umitpayiq, Qudaydin’ muhabbati, miyrim-sha’pa’a’ti ha’m jaqsilig’i sheksiz. Eger Quday gu’nakarg’a gu’nalari ushin o’zi to’lem to’lewge ruxsat berse, ol nabit boladi ha’m Qudaydin’ aldina bara almaydi. Kelin’, usi jerde bir misaldi ko’remiz.

Shotlandiyada zu’ra’a’t jiynap alatug’in waqitta hayallar jemisti baw-baw etip baylap shig’adi. Bir hayaldin’ balasina qarap turatug’in adami joq edi, ol oni o’zi menen alip kelip, atizdin’ shetireginde og’an qolayli etip otirg’ish islep otirg’izip qoydi. Qarawsiz qalg’an balani uship ju’rgen bu’rgit tuwri uship kelip, balani alip o’zinin’ uyasina alip ketti. Balani ko’tergen qusti adamlar ko’rip, jar salip baqirdi, biraq hesh kim tik tawdin’ u’stine bu’rgittin’ u’yasina ko’terile almadi. Bir neshe erkek adamlar minip ko’riwge ha’reket etti. Biraq ko’terile almadi. Aqiri ananin’ o’zi ha’reket etip ko’rmekshi boldi. O’zinin’ muhabbatinin’ pa’ti menen ol bu’rgittin’ u’yasina jetpegenshe ko’terilip baraberdi.

Son’ ol bu’rgitti quwip, o’zinin’ ele ziyan ko’rmegen na’reste balasin u’yadan tartip aldi. A’ste aqirin, sheksiz sabirliliq penen to’menge, yag’niy ku’tip turg’an doslarinin’ aldina tu’sti. Muhabbat jolin tapti. Ha’r qanday ja’rdemshiler ku’shsiz bolg’an jerde muhabbat jolin tapti. Solay etip, Quday gu’nakar adamdi joqarida hayal o’zinin’ na’restesin su’ygennen de ko’birek su’yedi. Gu’nag’a qurban bolg’an perzentlerin O’zinin’ aldina qaytariwdin’ jolin tabadi. Ol ha’mme waqit ekinshi mu’mkinshilik beriwshi Quday. Ol bizlerdi ku’tedi.

Hu’rmetli tin’lawshilar, usinin’ menen bu’gingi esittiriwimiz o’z juwmag’ina jetti.

Esittiriwimiz son’inda Quday barliq adamzatti su’yetug’inlig’in esletip o’tiwdi lazim dep taptiq. Sol menen birge gu’nakarlardi da. Doslar, o’zlerin’izdi abaylan’lar. Keyingi esittiriwlerimizde ushirasqansha xosh saw-salamat bolin’.