Assalawma a’leykum qa’dirli doslar. Bu’gin sizlerdin’ itibarin’izg’a qamaqxanadag’i bir hayaldin’ islegen isleri ha’m Qudaydin’ miyrim-sha’pa’a’ti haqqindag’i guwaliqti aytip bermekshimiz. Ol hayaldin’ atin sha’rtli ra’wishte Tamara dep aytamiz. Ol o’zinin’ ati aytiliwn qa’lemedi. Kelin’, Tamaranin’ guwalig’in o’zi aytip bergenindey etip baslaymiz. “Men esimdi tanig’animnan berli ata-anam meni jaqsi ko’rmeytug’inlig’in sezetug’in edim. Son’ anam menin’ tuwiliwimdi qa’lemegenligin bilip qaldim. A’kem men tuwilmasimnan aldin qaytis bolg’an eken, anam bolsa basqa adamg’a turmisqa shiqqan edi. Anamnin’ miyriminen ayrilig’anim azday, o’gey a’kem de meni tu’rte beretug’in edi. Olardin’ tu’rtkiley bergeninen sharshap, ko’shege qaship ketetug’in edim.

On bes jasqa tolg’animda, o’zimnen jasi u’lken bir jigitten ha’miledar bolip qaldim. Buni bilgenimnen son’, anam menen o’gey a’kem meni u’yden quwip jiberdi. Hu’kimettin’ ja’rdemi menen balamdi du’nyag’a keltirip, bir bo’lmeli kvartirada jasay basladim. Meni su’yetug’in, men su’yetug’in bir adamg’a mu’ta’j bolg’anim ushin balamdi aldirip taslamadim. Oni su’yip, jaqsi ko’remen, ol da meni jaqsi ko’redi dep oyladim. Biraq ele o’zim bala bolg’anim ushin ba yamasa miyir ko’rmey jasag’animnin’ azabi ma, balamnin’ tu’nde jilawlarina shiday almadim.

Bir ku’ni tu’nde tamam bolg’an o’mirim ushin oyang’an g’a’zebim ko’terilip, o’z-o’zimdi basqara almay, ko’pshikti alip balamnin’ ju’zin bastim. Onin’ jilawi toqtamag’ansha, basip turaberdim. Balam o’lgen edi.

Meni hu’kim etip, qamaqxanag’a jiberdi. Gazetalarda men tuwrali jazdi. Sol waqitta balamdi o’ltirip qoyg’anim ushin ishimnen qatti azaplanip, atim gazetalarda shiqqanina qatti ta’shwishlenetug’in edim. Qamaqxanada hesh kimge qosilmay, hu’jdan azabi menen jasap basladim. O’zim miyir ko’rmey o’sken bolsam da, balama miyir bermekshi edim, onin’ miyrimin ko’rmekshi edim.

Bir ku’ni qamaqxanamizg’a bir hayal keldi. Ol qamaqxanadag’ilar menen Quday haqqinda, Onin’ siylari haqqinda so’ylesti. Onin’ ga’pleri menin’ ju’regime qatti ta’sir etti. Ha’mme shig’ip ketkennen son’, ol menen so’ylesiwdi qa’ledim. Onin’ o’zi ga’p basladi. Ol da bizlerge uqsap gu’naka’r bolg’anin, o’mirin, gu’nalarin jasirmay aytip berdi. Men de ne islegenimdi jasirmay aytip berdim. Ol mag’an bilay dedi: “Tamara, sen ha’mme waqit Qudayg’a qa’dirli bolg’ansan’. Ol senin’ barliq qayg’ilarin’di bilgen, Ol ha’mmesin ko’rip turg’an. Onin’ Ruwxi senin’ menen birge jilaydi.

Ol sen mu’ta’j bolg’an ha’m sen jog’altqan ha’mme na’rseni sag’an qaytariwdi qa’leydi. Ol seni etken islerin’e qaramay ba’ribir jaqsi ko’redi. Biraq seni usilayin’sha taslap qoymaydi. Iysag’a o’mirin’nin’ esigin ash, Oni qabil et, sonda Ol senin’ ju’regin’di tub-tu’binen o’zgerte baslaydi. O’mirin’nin’ bo’leklerin alip olardi birlestiredi. Odan jaqsi bir na’rse tayarlaydi”.

Sodan keyin Men Qudaydi o’mirime qabil ettim. Ju’regimdegi awiriw jen’il tartti. Quday meni islegen islerim ushin keshirgenin, meni qabil etkenin sezdim. Son’ o’mirim shini menen o’zgerdi. Men endi Qudaydin’ su’yispenshiligine, keshirimine ha’m tinishlig’ina iye edim. Bul siylar meni pu’tkilley basqa adamg’a aylantirdi”.