Assalawma a’leykum qa’dirli tin’lawshilar. Bu’gingi sa’wbetimiz u’lken ha’m kishi adamdi, bay ha’m kambag’aldi birdey qiziqtiratug’in, o’zine tartatug’in pul haqqinda boladi. Solay etip, pul bul ne o’zi? Ol geybirewler ushin baxit, geybirewler ushin jaqsi jasaw orayi, tag’i basqalar ushin qanday da bir na’rseler satip aliw mu’mkin bolg’an qimbatbahali qag’az. Negizi pul ol hesh na’rse emes, ol tek g’ana bir qag’az, biraq sonin’ menen birge kimler ushin ha’mme na’rse. Pul geybirewler ushin arman, u’mit, erkin jasaw, qa’legen isti orinlaw, qa’legen na’rsesine iye boliw. Geybirewler puldi man’lay teri menen keletug’in ha’m onsha ko’p bolmaytug’in qimbatbahali qag’az dep esaplaydi. Puldin’ bar-joqlig’i adamnin’ o’mirine ta’sir etedi.

Shini menen pul ha’mmemizdin’ jasawimizdi o’zgerttiredi. Biraq adamnin’ pulg’a bolg’an mu’na’sa’beti onin’ o’mirge ha’m adamlarg’a bolg’an mu’na’sa’betine ta’sir etedi. Adamnin’ pulg’a bolg’an qarim-qatnasi onin’ balalig’inan payda boladi. Ata-analar o’zleri bilmegen tu’rde balalarina pul haqqinda pikirlerin sin’diredi. Misali qiynalip, awir miynet sebepli pul tabip atirg’an a’keler balalarina: “Pul talda o’speydi, oni qiynalip tabasan’”, dep u’yretedi.

Qiynalmay pul tabip atirg’an shaqqan ata-analar: “Pul tabiw qiyin emes, en’ a’hmiyetlisi qay jerden pul shig’iwin bilsen’ boldi”, dep u’yretedi eken. Geybir ata-analar bolsa “Baxitti ha’m den-sawliqti pulg’a satip ala almaysan’” – dep aytadi. Tag’i basqa ata-analar “Pul jawizliqti tuwdiradi, pulg’a kewil qoyiw Qudaydan uzaqlastiradi. Pul iyesinin’ biyishke bariwina tosqinliq etedi”- dep pikir bildiredi. Qullas ata-analardin’ pulg’a bolg’an qarim-qatnasi balasina da o’tedi eken. Pul haqqinda tuwri pikirleytug’in adamlar ju’da az.

A’lbette pulg’a baxitti, muhabbatti ha’m den-sawliqti satip ala almaymiz. Puli az adamlar da baxitli boliwi, muhabbatqa toli o’mir jasawi mu’mkin. Shini menen pulg’a kewil qoyiw, adamdi iseniminen uzaqlastiradi. Muxaddes Kitapta Iysa Masiyx bilay deydi: “Hesh kim eki xojaying’a xizmet ete almaydi. Sebebi ol birewin jek ko’rip, ekinshisin jaqsi ko’redi yamasa birewine sadiq bolip, ekinshisine itibarsiz qaraydi. Sizler ha’m Qudayg’a, ha’m bayliqqa birdey xizmet ete almaysizlar” (Mark 6:24).

Adamnin’ pulg’a bolg’an qarim-qatnasi Qudaydin’ na’zerinde de tuwri boliwi kerek. Pul baxit keltire almaydi eken, biraq onin’ joqlig’i da adamdi aldin’g’idan da baxitli etip qoymaydi. Pul menen duris qarim-qatnasta bolg’an insan oni jamanliq jolinda isletpeydi. Jaqsi qollardag’i pul iyesine ha’m a’tirapindag’ilarg’a jaqsiliq keltiredi. Ko’pshiliktin’ oylag’aninday pul jawizliq orayi emes, kerisinshe pulg’a o’sh boliw jawizliq orayi boladi eken.

Adamnin’ pulg’a bolg’an mu’na’sa’beti onin’ qanday jasawina, qansha pul tabiwina da ta’sir etedi. Ha’dden tis pulg’a berilgen adamlar, hu’rmet, miyir, jaqsiliq siyaqli sezimlerden uzaq boladi. Puldi jawizliq orayi, puldin’ ko’pligi adamg’a ziyan keltiredi, dep bilgenler, az pul tabip zorg’a ku’nin ko’redi. Bul eki jag’day da tuwri emes. Puldi Qudaydin’ siyi dep biliw lazim. Biraq oni o’mirdin’ bas ma’qseti etip qoyiw da kerek emes. Siz jaqsi jasawin’iz ushin jeterli pul tabiwg’a qa’dirsiz.

Quday bergen ku’shti, uqipliliqti shan’arag’in’izg’a jeterli tu’rde pul tabiwina jumsan’. Biraq ma’qsetin’iz tek g’ana pul tabiw bolip qalmasin qa’dirli doslar.