Perzentler er jetip, mustaqil o’mirge birinshi qa’demlerin baslag’aninda o’zleri menen Iysag’a bolg’an isenimin de birge aliwi lazim. Hu’rmetli ata-analar, ha’zirgi qiyin bir da’wirde balalardin’ ta’rbiyasinday awir bir juwapkershilik ha’r birewimizdin’ moynimizda jatadi. Eger ha’r bir ata-ana bala ta’rbiyasina aniq ha’m shin kewilden o’zinin’ ha’m balalarinin’ keleshegi menen qiziqsa, bul xizmet keleshekte o’zinin’ na’tiyjesin ko’rsetedi. Bul juwapkershilikli isti baslawdan aldin ata-analardin’ o’zleri tayar boliwi kerek. Waqit saati kelip ha’r bir perzent bo’lek jasaw ushin ata-anasinin’ u’yinen ketedi. Buni tap quslar o’zlerinin’ palapanlarin ushirg’ang’a uqsatiw mu’mkin.
Usi waqitta balalarimiz ata-anasinin’ u’yinen en’ qimbatbahali na’rseni alip ketiwi kerek boladi. Bul balalig’inda alg’an ta’rbiyasi esaplanadi. Sonin’ menen birge en’ a’hmiyetlisi ha’r bir perzent isenimde bekkem boliwi lazim. Olar bo’lek jasawdi baslag’aninda da, ha’mme waqit duwa etiwde ha’m Qudayg’a bolg’an isenimde bekkem tura alatug’in boliwi kerek. Eger ata-ana perzentlerine jaqsi ta’rbiya bergen bolsa demek, olardin’ kewili tinish boladi.
Sebebi perzentleri olardan uzaqta bolsa da Quday menen birge ekenin biledi. Quday menen birge bolg’an adamdi, Quday hesh qashan jalg’izlatip qoymaytug’inin ha’mmemiz jaqsi bilemiz. Balalarimizdi usinday isenimde bekkem qilip o’stiriw o’z-o’zinen bolmaydi. Eger ha’r ekshembi ku’nleri shan’araq ag’zalari ibadatxanag’a barsa da, balalarimizda bizler ko’zlegen ma’qset birden payda bolip qalmaydi.
Barlig’i u’ydegi sharayitqa yamasa awhalg’a baylanisli. Balalarimiz jaqsi ta’rbiya aliwi ushin, en’ jaqsi mektep bul – onin’ o’zi jasap atirg’an u’yi bolip tabiladi. Shinin aytatug’in bolsaq, bag’shada da, mektepte de hesh kim perzentlerin’izdin’ ta’rbiyasina sizdey bolip qiziqpaydi. Bul o’z na’wbetinde ata-ananin’ bala ta’rbiyasina turaqli ha’m teren’ ko’z qarasta boliwdi talap etedi. Ha’r bir iseniwshi shan’araq birinshi bolip balalarg’a ha’r qanday azg’iriliwlarg’a, qorqinishlarg’a, qiyinshiliqlarg’a ha’m tosqinliqlarg’a qarsi tura aliwdi u’yretiwi lazim dep oylaymiz. Sebebi ha’zir bizler jasap atirg’an da’wirde, adamdi ta’shwishlendirip, joldan buratug’in na’rseler ju’da ko’p. Ha’r bir iseniwshi o’zinin’ o’miri arqali basqalardan ajiralip turiwi kerek. Bul o’zinin’ bekkem isenimi menen Qudaydin’ ko’z aldinda tuwri ju’riwi ha’m a’jayip ta’rbiyasi menen ko’rinedi.
Bizler perzentlerimizdi jas bir talg’a uqsatiwimiz mu’mkin. Eger ha’r bir bag’ban jas taldi jaqsi o’stirse, a’lbette keleshekte jaqsi jemis beriwshi terekke aylanadi. Usi juwapkershilikli iste Quday sizge sabirliliq bersin doslar. Qa’dirli ata-analar Quday bizlerge perzenttey bir a’jayip sawg’a inam etken eken, usi sawg’ani qa’dirlep, oni Quday qa’legenindey qilip o’stiriwge ha’reket eteyik. Bul iste Jaratqan Iyemiz bizlerge a’lbette ku’sh ha’m danaliq beredi.
