Assalawma a’leykum qa’dirli doslar. Bu’gingi esittiriwimizde sizler menen balalar ta’rbiyasi haqqinda so’ylesemiz. Shan’araqqa perzent tuwilip kelgende ata-ana qa’nshellim quwanishqa tolatu’g’inlig’in ha’mmemiz jaqsi bilemiz.

Bir shan’araqta perzent tuwilig’aninan keyin, aradan eki jilday waqit o’tkennen son’, bir dana adamnin’ aldina balani alip kelip, balamiz jaqsi ta’rbiya aliwi ushin isti neden baslasaq boladi dep sorapti, dana adam, balan’izg’a jaqsi ta’rbiya beriw ushin eki jilg’a keshigipsiz dep aytipti.

Balag’a ta’rbiyani ol ele anasinin’ ishinde gezinde berip baslaw kerek eken. Ol qalayinsha dep oylaysizba? Orinli soraw. Bala anasinin’ ishinde gezinde anasi ko’birek jag’imli muzikalar tin’lasa yamasa ko’birek kitaplar oqisa, tuwilajaq na’reste ushin ku’tiniw menen a’were bolsa, a’lbette balag’a jaqsi ta’sir etedi. Shan’araqta ha’r ku’ni uris ja’njel, bolajaq ana ko’p bolar bolmas na’rselerge qisinip ishine ala berse, onda olar a’lbette balanin’ rawajlaniwina jaman ta’sir etkizbey qoymaydi. Bul menen bir qatarda ja’ne bir misal aytip o’tpekshimen.

Bir shan’araqta na’reste du’nyag’a kelgennen keyin ol ju’da’ jilawiq bolip qaladi, anasi hesh bir jumislarin islewge waqit taba almaydi. Bul bir neshe waqit dawam etedi ha’m anasi na’resteni shipakerlerge ko’rsetedi, biraq olar hesh ja’rdem bere almaydi, shipakerler na’resteni psixoloqqa ko’rsetiwge ken’es beredi, biraq psixologlar ha’m ja’rdem bere almaydi. Anasi u’mitsiz u’yine qaytadi. Bul ja’ne bir qansha aylar dawam etedi. Bir ku’ni anasi balasin u’yqilatip, o’zi kir juwatu’g’in mashinasinda balasinin’ kiyimlerin juwip baslag’anda, balasi ja’ne jilay baslaydi, na’ ilajliqtan balasin xanag’a alip kiredi, sol waqitta na’reste jilawdi toqtatip ku’le baslaydi. Anasi hayran bolip balani basqa xanag’a alip kiredi. Bala ja’ne jilay baslaydi, anasi balani kir juwatu’g’in xanag’a alip kiredi, bala ja’ne tinishlanip ku’le baslaydi. Anasi hesh na’rsege tu’sinbey, bolg’an waqiyani shipakerlerge aytip beredi. Shipakerler anasi ha’miledar gezinde qanday jumista islegenligi haqqinda sorag’anda, anasi ha’miledar waqtinda a’dette shawqim bolatug’in zavodda stanoktin’ qasinda turip jumis islegenin aytadi. Bala ele anasinin’ ishinde gezinde og’an ha’mme na’rse ha’r qiyli ta’sir etetu’g’inlig’i mu’mkin ekenligin bilsek boladi. “Ne eksen’ soni orasan’” degen xalqimizda ga’p bar. Demek, balag’a jaqsi ta’rbiya beriw bul ata-ananin’ waziypasi sanaladi. Eger terekti jaqsi suwg’arip qarasaq ol a’lbette jaqsi miywe beredi. Perzent ha’m sonday. Sonin’ ushin kelin’ler perzentlerimizdin’ ta’rbiyasi haqqinda ha’zirden oylayiq. Keyingi esittiriwimizde usi temadag’i ken’eslerimizdi dawam etemiz. Ja’ne efir arqali ushirasqansha xosh, qa’dirli doslar.

Ha’r bir shan’araqta ata-ana ha’wes etken perzentler du’nyag’a kele bersin dep Jaratqan Iyemizden sorap qalamiz.