Assalawma a’leykum qa’dirli doslar. Sizler menen keliskenimizdey o’tken sapardag’i balalar ta’rbiyasi haqqindag’i temamizdi dawam etemiz. Bala ta’rbiyasinda bizler nelerge itibar beriwimiz kerek?

Geybir waqitlari bala embeklep baslag’aninda ol embeklep barip magnitofonin’izg’a yamasa basqa qimbat zatlarin’izdi uslap baslaydi, sol gezde siz onin’ qasina barip bul qimbat turatu’g’in zat ekenin ha’m bul zatti uslawg’a bolmaytu’g’inlig’in aytip tu’sintirin’ de balani ko’terip basqa jerge alip aparip qoyin’, bala buni ja’ne qaytalawi a’lbette ta’biyiy hal. Siz ha’m joqarida aytip o’tilgen ken’esimizdi bir neshe ret ta’krarlan’, biraq balan’iz sonda da uslay berse onda jazalawin’iz mu’mkin. Biraq a’lbette su’yispenshilik penen jazalan’ ha’m og’an oni ne ushin jazalag’anin’izdi a’lbette tu’sintirin’. Biraq bala tiyinip qoymay atirg’an bul zatti joqariraq balanin’ qoli jetpeytu’g’in jerge hesh qashan alip qoyman’. En’ jaqsisi balag’a bul zatqa ruxsatsiz tiyiniwge bolmaytu’g’inlig’in u’yretin’. Eger siz bul zatti joqariraqqa alip qoysan’iz, ba’lkim bir jerge miymang’a barg’anin’izda sol u’ydin’ iyesinin’ usinday zati to’mende turg’an boliwi mu’mkin. Sol gezinde balan’iz arqayin ruxsatsiz birewdin’ zatina tiyiniwi mu’mkin. Joqarida aytip o’tken pikirimiz sizge ha’m balan’izg’a jaqsi paydali boladi dep u’mit etemiz. Endi ekinshi ja’ne bir ken’esimiz.

Bala kishkene waqtinda haqiyqattan ha’m suliw ha’m mazali boladi. Biraq usinday waqitlarinda ko’plegen ata-analar ayrim zatlarg’a onsha itibar bermeydi ha’m keyinshelik bul a’det balada qalay payda bolg’anina hayran qaladi. Bir gezleri bizler balalarimizdi qatti erkelegenimizden ayrim so’zlerdi o’zimiz naduris aytamiz: Misali: sizge ne alip bereyin, degen so’zdi, balani erkelegen gezimizde “shijge ne alip beyin” yamasa Morojniy so’zin Majojiy, Ku’shik so’zin wav-wav dep aytip baslaymiz. Bala bizlerden qalay esitse solay qabil qiladi ha’m esitkenindey so’yley baslaydi. Sonin’ ushin tek g’ana bala menen so’yleskende emes al ha’r bir qilip atirg’an islerimizde ha’m balalarimiz bizlerge diqqat penen itibar qaratatu’g’inlig’ina bizler ha’m itibar beriwimiz kerek. Sebebi “Qu’s U’yasinda ko’rgenin qiladi” degen xalqimizdin’ dana ga’pi bar. Sonin’ ushin balalarimizg’a tek g’ana o’zlerimizdegi jaqsi zatlardi u’yreteyik. Bunin’ ushin birinshi bolip bizler yag’niy ata-analar tek g’ana basqa adamlardin’ aldinda emes al balalardin’ ha’m ko’z aldinda nurday jasnap turiwimiz kerek.

Sonin’ menen bu’gingi bala ta’rbiyasi haqqindag’i paydali ken’esler esittiriwimizge juwmaq jasaymiz ha’m sizler menen xoshlasip qalamiz qa’dirli doslar. Ha’mme waqit balalarimizg’a jaqsi ta’rbiya beriwimizde Jaratqan Iyemiz bizlerge sabirliq ha’m danaliq bersin.