Assalawma a’leykum qa’dirli tuwisqanlar. Sizler menen efir arqali ushrasip turg’animizdan quwanishlimiz. Bu’gingi temamiz biraz denemizdi qiynaytug’in – oraziw tutiw haqqinda. Bizler kimbiz? Ne ushin bizler oraza tutiwimiz kerek? Qudaydi ja’nede ko’birek biliwimiz, o’mirimizde O’zinin’ Muxaddes Ruwxi bar ekenin ko’rsetiwi ha’m usi arqali bizlerge shipa berip, bizlerdi azat etiw ma’qsetinde, Ol oraza tutiwdi oylap tapqan. O’mirimizdin’ ha’r bir bo’legi – aqliy, fizikaliq, ruwxiy ha’m emotsional ta’repleri oraza tutiw arqali bereketlenedi, ol dushpannin’ bizlerge qarsi niyetlerin buzadi. Geybir jawiz ruwxlar oraza tutiw arqali quwip jiberiliwi haqqinda Muxaddes Kitapta aniq jazilg’an. Iysadan sha’kirtleri ne ushin jawiz ruwxlar olarg’a boysinbag’anin sorag’aninda, Iysa olarg’a bilay juwap berdi: “…jinlerdin’ bunday tu’rin tek duwa etiw ha’m oraza tutiw arqali quwip shig’ariwg’a boladi”, dedi (Mark 9:29).
Oraza tutiwdin’ waziypasi haqqinda Muxaddes Kitapta bilay aytilg’an: “Men qa’legen oraza – adalatsizliq shinjirlarin sheshiw, moyintiriq jiplerin u’ziw, ezilgenlerdi azat etiw, ha’r qanday moyintiriqti sindiriw emes pe? …jaqinlarin’izdan ja’rdemizn’izdi ayaman’” (Iyshaya 58:6-7). Oraza tutiw usi waziypalardin’ ha’tteki birewin orinlasa da, ruwxiy shipa izlegen ha’r bir adam boysiniwshiliqqa qa’dem qoyg’an bolar edi. Kim shaytannin’ moyintiriqlarinan azat boliwdi qa’lemeydi? Qudaydin’ ku’shi o’zinin’ o’mirine ha’m is-ha’reketine kiriwine kim mu’ta’j emes? Kim hesh bolmag’anda bir negativ sezimnen qutiliwdi qa’lemeydi?
Bizler ha’mmemiz buni qa’leymiz. Onda bizlerdi oraza tutiwdan ne uslap turipti? Sawatsizliq ha’m qorqinish. Bizler Muxaddes Kitapta oraza tutiw haqqinda ne dep aytilg’anin ha’m onin’ a’jayip imkaniyatlari tuwrali hesh na’rse bilmeydi ekenbiz. Eger awqatlanbay uyqilawg’a jatag’oysaq, tu’nde ashliqtan o’lip qoliwdan qorqamiz. Yamasa basimiz awiriwi, qusqimiz kelip, ha’lsirep, miyimiz aylaniwi mu’mkin degen oylar qorqitadi. Biraq sog’an qaramastan, bu’gin kelin’, orazanin’ jaqsi ta’replerin ko’rsetetug’in bir neshe da’lillerdi ko’rip shig’amiz.
Eski ha’m Jan’a Kelisimde oraza tutiw seksen ma’rteden de ko’birek tilge aling’an eken. Iysanin’ O’zi de oraza tutqan. Eger oraza tutiw bizlerdin’ den-sawlig’imizg’a ziyan, paydasiz bolsa, Muxaddes Kitapta bunshelli ko’p aytilmag’an bolar edi dep oylaymiz. Oraza – bul ruwxiy shinig’iw bolip, oraza waqtinda a’dette bizler ibadat etiw menen shu’g’illanamiz. Quday menen so’ylesemiz, birge waqit o’tiremiz. Bul bizlerge jaman ta’sir etkizbeydi, kerisinshe o’mirimiz ta’rtipke keledi. Ta’rtip bolsa ha’mme waqit siyliqlanadi.
Fizikaliq shinig’iwlardi etip denemiz ushin siy alg’animizday, oraza ko’rinisindegi ruwiy ta’rtip te ruwxiy siyliqlanadi. Oraza bizlerdin’ ruwximizdi, kewlimizdi ha’m denemizdi pa’kleydi. Oraza bizlerdi Qudaydin’ ju’zin izlewge ha’m Ol menen jaqin qarim qatnasta boliwg’a u’ndeydi. Qudaydin’ dawisin esitiwge ha’m Onin’ erkin tu’siniwge ja’rdem beredi. Bizler oraza haqqinda budan da ko’birek sa’wbetlesiwimiz mu’mkin, biraq waqitimiz shegaralang’ani ushin sizler menen keyingi esittiriwimizge shekem xoshlasamiz. Xosh saw-salamat bolin’ hu’rmetli doslar.
