Siz benen bizler ko’rip tu’rg’an pu’tkil jaratilislar ha’m barliq na’rselerdi Quday alti ku’n dawaminda jaratip, jetinshi ku’ni dem alg’an edi. Quday sharshag’ani ushin emes, al barliq jaratqanlarin ko’rip ha’zetip jetinshi ku’ni dem alg’an edi. Ol jetinshi ku’ndi jarilqap, oni muxaddes etip ayirdi. Sebebi Ol usi ku’ni O’zinin’ barliq jaratiwshiliq islerinen dem aldi. Sonliqtan bazar ku’ni ha’mmemiz dem aliwg’a ha’reket etemiz.
Qa’dirli doslar, bul dem aliw degende tek ha’zetip jatiw degeni emes, al dem aliw menen birge Qudaydin’ barliq jaratqan na’rseleri ushin shu’kirshilik etip Onin’ Atin alg’islawimiz kerek degeni dep oylayman. Hu’rmetli tin’lawshilar kelin’, Quday ta’repinen bes ku’n dawaminda jaratilg’an na’rseler haqqinda oylap ko’remiz. Quday bir so’zi menen aspan menen jerdi jaratti. Jaqtiliqti, jer ustindegi suwdi, okeanlardi, sol menen birge ten’izdegi ha’m jerdegi haywanlardi jaratti. O’simlikler, terekler ha’m gullerdi de jaratti. Quyash, ay ha’m juldizlardi da jaratti. Quday bulardin’ barlig’in O’zi ushin jaratpadi. Ol hesh na’rsege mu’ta’j emes. Onda Ol bulardin’ barlig’in ne ushin jaratti degen soraw tuwiladi.
Quday su’yispenshilik, diqqat ha’m bekkemlik penen O’zinin’ aqirg’i do’retiwshiligi bolg’an Adamdi jaratiw ushin tayarliq retinde ha’mmesin jaratti! Bul Qudaydin’qalg’an barliq jaratilislar ishinde en’ a’jayip jaratilisi edi.
Quday Jaratilis kitabinin’ 1:26 ayatinda: “O’z ko’rinisimizdey qilip, O’zimizge uqsatip, adamdi jaratayiq. Olar ten’izdegi baliqlar, aspandag’i quslar, mallar, jer bawirlawshilar ha’m jer betindegilerdin’ ha’mmesi u’stinen ha’kimlik etsin!” dedi. Sizdin’ pikirin’izshe Quday bulardi aytqanda kimge qarata aytqan dep oylaysiz? Bul o’z-ara so’ylesip turg’an Quday A’kemiz, Quday Uli ha’m Quday Muxaddes Ruwx edi. Olar adamdi Qudayg’a uqsatip jaratiw haqqinda so’ylesken edi.
Jaratqan Iyemiz ulli ha’m qu’diretli Quday! Adam Qudaydin’ jerdegi en’ a’hmiyetli jaratilisi edi, sonin’ ushin ha’m oni O’zine uqsatip jaratiwg’a qarar qilg’an edi. Qudaydin’ Muxaddes Kitabinda birinshi adam Qudaydin’ ko’rinisinde jaratildi dep aytqani neni an’latadi dep oylaysiz?
Onin’ bizlerdin’ denelerimizde na’zerde tutqanin bilemiz. Quday Ol Ruwx. Qudaydin’ bizlerge uqsap denesi ha’m su’yekleri joq. Aniqlap qarasaq, Quday bizler ko’re almaytug’in na’rseler haqqinda aytadi. Ol bizlerdi jan ha’m ruwxqa iye etip jaratti. Adamlar Qudayg’a uqsap his hayajan, aqil ha’m erkinlikke iye etip jaratildi.
