Assalawma a’leykum qa’dirli doslar. Bu’gingi esittiriwimizdi bir soraw menen baslamaqshi edik. Ne dep oylaysiz, Qashan insan o’zi niyet etkendey, yamasa Quday ku’tkenindey mol jemis beredi? Bul sorawg’a juwap beriwden aldin, kelin’, Muxaddes Kitaptag’i Ezekiel payg’ambardin’ so’zlerin oqip shig’amiz. “Keyin meni jag’ag’a alip shiqti. Jag’ag’a shiqqanimda, men eki jag’ada da ko’p tereklerdin’ o’sip turg’anin ko’rdim. …Da’ryanin’ eki ta’repinde ha’r tu’rli miywe ag’ashlari o’sedi, japiraqlari solimaydi, miyweleri tawisilmaydi, ha’r ayda miywe beredi. O’ytkeni Muxaddesxanadan shiqqan suw olardi suwg’aradi. Miyweleri aziq boladi, al japiraqlari shipali boladi” (Ezekiel 47:6-7, 12). Bunday miywe ag’ashlardi ko’riwdin’ o’zi de bir jag’imli dep oylaymiz. Bul so’zlerdi oqip atirip, sol terekler ko’z aldima kelip ketti.
Biraq bizler bul miywe ag’ashlarin ko’riwdi emes, al tap sonday miywe ag’ashlari boliwdi tilewimiz kerek dep oylaymiz. Quday Muxaddes So’zinde aytqan miywe ag’ashi bola alamiz ba? Bunin’ ushin kelin’, ja’ne bir ma’rte Ezekiel kitabin oqiymiz. Eger itibar bergen bolsan’iz, miywe ag’ashlarinin’ tu’binde muxaddes suw ag’ip tur. Ol suw qay jerden keledi? Muxaddes Kitap bul haqqinda bilay deydi: “Keyin ol meni qaytadan Ibadatxana qapisina alip bardi. Ibadatxana shig’isqa qarap turg’an edi. Men Ibadatxana bosag’asinin’ astinan shig’isqa qaray suw ag’ip turg’anin ko’rdim. Suw Ibadatxananin’ qubla ta’repinen shig’ip, qurbanliq orinnin’ qublasi arqali ag’ip turg’an edi” (Ezekiel 47:1). Bul ka’ramatli suw Ibadatxananin’ astinan ag’ip turatug’in edi. Ibadatxana Qudaydin’ belgisi edi. Ibadatxanag’a jaqin boliw, onin’ ishinde xizmet etiw, Qudayg’a xizmet etiw degeni edi.
Demek, Quday ta’repinen beriletug’in muxaddes suwg’a toyg’an miywe ag’ashlar ha’r ay miywe beredi. Japiraqlari hesh qashan quramaydi. Tamirlari jerge bekkem baylanip, ha’mme waqit jap-jasil bolip tura beredi. Ha’r bir iseniwshi usinday miywe ag’ashi boliwdi qa’leydi dep oylaymiz. Qudayg’a jemis berip, hesh qashan quwramay, astinan suw ag’ip turiwdi ha’m ha’mme waqit Quday menen qarim-qatnasta boliwdi qa’leydi. Bul ju’da jaqsi tilek. Biraq bul ka’ramatli suw o’zi ne eken? Muxaddes Kitapta Iysa bul suw haqqinda bilay deydi: “Men beretug’in suwdan ishken ha’r bir adam ma’n’gige sho’llemeydi. Kerisinshe, Men beretug’in suw onin’ ishinde ma’n’gilik o’mir beretug’in tiri bulaqqa aylanadi” (Yuxan 4:14).
Iysa bul So’zleri arqali Muxaddes Ruwxqa isharat etip atir edi. Shini menen de Iysa Masiyx beretug’in Muxaddes Ruwx adamnin’ Qudayg’a bolg’an sho’lin basadi. Bunday adam hesh qashan Qudayg’a mu’ta’j bolmaydi. Usi Muxaddes Suwg’a iye bolg’an ha’r bir adam da’rya boyindag’i miywe ag’ashlarg’a uqsap ha’mme waqit jap-jasil bolip, ko’rgen adamnin’ ha’wesin keltiretug’in da’rejede jemis beredi.
Eger bizler Muxaddes Ruwxqa tolip, mol jemis bersek, Qudaydin’ kewli toladi. Ol bizlerdin’ ja’nede gu’llep-jasnawimiz ushin jarilqaydi. Bizlerdin’ miywelerimiz, Quday menen bekkem baylanista ekenimizdi ko’rsetip qoymay, Og’an alg’islar da aytadi. Quday bizlerdin’ tap usinday o’mir su’riwimizdi, Og’an jaqin bolip, Onin’ muxaddes Suwina toyip jasawimizdi qa’leydi. Sonda jemisimiz mol boladi. Mol jemis beriw haqqinda ja’nede ko’birek biliwdi ha’m esitiwdi qa’lesen’iz bizlerdin’ danaliq.com saytimizg’a shaqirip qalamiz.
