A’tirapimizdag’i pu’tkil barliq jaratilislar qalay payda bolg’anlig’i haqqinda hesh oylap ko’rgensiz ba? Jer qalay payda bolg’an? Ol neden jaratilg’an? Juldizlar, planetalar ha’m haywanlar qalay payda bolg’an? Siz ha’m men, uliwma adamzat haqqinda ne dep oylaysiz?

Muxaddes Kitap, ha’mme na’rseni Quday jaratqan dep bizlerge aytadi! Kelin’, Quday Jaratilis Kitabinda bul dun’yanin’ jaratiliwi haqqinda jazg’anlarin birgelikte ko’rip shig’amiz. “En’ basta Quday aspan ha’m jerdi jaratti” bul a’jayip jaratilis haqqindag’i ayatti, bizler Jaratilis Kitabinin’ 1 bap 1 ayatinda oqiwimiz mu’mkin. Ha’mme na’rsenin’ baslaniwi bar.

Hesh kim ha’m hesh na’rse jaratilistan aldin bolmag’an. Biraq, ha’mmemizge aniq bolg’aninday tek g’ana Quday bolg’an. Quday aspan menen jerdi jaratiw ushin neden paydalang’an? Degen soraw ko’pshilikti oylantiradi dep oylaymiz. “Jaratiw” bul “hesh na’rseden jaratiw” yag’niy “joq jerden payda etiw” degen eken. A’piwayi misal, eger bir na’rse qilajaq bolsaq bizlerge material kerek boladi. Al biraq bizlerde material bolmasa ne qila aliwimiz mu’mkin? A’lbette hesh na’rse ete almaymiz. Tek g’ana Quday hesh na’rseden bir na’rse jarata aladi. Endi ja’ne bir soraw payda boladi. Qalay Quday aspan menen jerdi hesh na’rseden jarata aldi? Muxaddes Kitap, Quday ushin hesh qanday imkansiz na’rse joq, dep aytadi. Misali, Eremiya kitabinin’ 32 bap 17 ayatinda “O, Quday Iye! Ulli qu’diretin’ ha’m sozilg’an qolin’ menen Sen ko’klerdi ha’m jerdi jarattin’. Sag’an mu’mkin emes na’rsenin’ o’zi joq” – dep jazilg’an. Qudaydan ku’shlirek bolg’an kimdir bar ma? Perishteler me? Shaytan ba? Jinler me? Yaq! Hesh kim Quday siyaqli ku’shli emes! Tek g’ana Quday bunday qu’diretke iye.

Sebebi Muxaddes Kitap O’zi bizlerge solay dep aytadi. Jer formasiz, ko’riksiz ha’m bos hesh na’rse joq edi. Bizler, Muxaddes Kitapti oqip u’yrengenimizde, Quday oni qalay payda etkenin, jerdi qalay toltirg’anin ko’remiz. Quday Ol qu’diretli ha’m jaratiw ushin Ol O’zinin’ ulli ku’shinen paydalandi. Muxaddes Kitap, Qudaydin’ Ruwxi “suwdin’ u’stinde uship ju’retug’in edi” dep aytadi. Qudaydin’ O’zi barliq na’rseni ha’reketke keltirdi! Ol bar ku’shtin’ baslanatug’in orayi bolip tabiladi. Quday A’ke, Quday Ul, Quday Muxaddes Ruwx – usi u’sh birlik jaratilistin’ qu’diretli is- ha’reketinde qatnasqan. Ol barliq na’rsenin’ Jaratiwshisi. Basqa so’zler menen Qudaydin’ kim ekenligin aytatug’in bolsaq, Muxaddes Kitap Qudaydi muxaddes dep aytadi, ha’m usi muxaddeslikke hesh bir insan gu’mansiray almaydi.

So’zimizdi da’llilew ushin Muxaddes Kitaptag’i bir ayatti sizlerdin’ itibarin’izg’a qaratpaqshimiz. Iyshaya kitabinda “A’lemnin’ Jaratqan Iyesi, Muxaddes, muxaddes, muxaddes! Pu’tkil a’lem Onin’ saltanatina tolg’an” dep jazilg’an. Quday barliq na’rseni jaratqani haqqinda O’zinin’ So’zi arqali bizlerge aytadi. Muxaddes Kitapti u’yrenip atirip, bizler Quday ha’mme na’rseden ulli, a’hmiyetli, qu’diretli bolg’anin ko’rdik. Ol ushin hesh na’rse qiyin emes ekenin de ko’rdik. Ol barliq ku’shtin’ orayi ha’m pu’tkil a’lemnin’ Jaratiwshisi ekenin ko’rdik. Usinin’ menen birge Ol bizlerge O’zinin’ So’zi bolg’an Muxaddes Kitapti bizlerge berdi, sonin’ ushin bizler Oni bilip aliwimiz, u’yreniwimiz ha’m ha’r ku’ni Onin’ menen birge jasawimiz kerek dep oylaymiz.