Assalawma a’leykum hu’rmetli tuwisqanlar. Sizler menen ja’ne ushrasqanimizdan quwanishlimiz. Kelin’, bu’gin sizler menen Matta kitabinin’ 18 bap 1 ayatinan 14 ayatina shekemgi jerlerin oqip u’yrenemiz. Eger usi ayatlardi diqqat penen oqisaq, Iysa Masiyxtin’ sha’kirtleri, Iyemizge “Aspan Patshalig’inda en’ ulli kim?” dep sorag’anin ko’rsek boladi. Bul soraw Matta 18:1 ayatta jazilg’an.
Olar a’lbette o’zlerin na’zerde tutqan edi. Sonda Iyemiz qasina kishkene bir balani shaqirip, oni misal etip ko’rsetedi. Ha’m keyin ne degenin usi baptin’ 3 ayatinda oqisaq boladi: Sizlerge shinin aytip turman: kewillerin’izdi o’zgertip, balalar siyaqli bolmasan’iz, Aspan Patshalig’ina kire almaysizlar.”
Bir na’rsege itibar bersek, Iyemiz balani aldina shaqirdi, demek bala o’zi ju’rip Onin’ aldina keldi, balanin’ onsha kishkene ha’m onsha u’lken ha’m emesligin tu’sinsek boladi.
Sha’kirtleri bul sorawdi bergeninin’ ma’qseti, olar aspan patshalig’inda en’ ulli men bolaman dep oylag’an. Bul haqqinda o’z-ara tartisip, Iyemizden sorawg’a qarar qilg’an. Iyemiz olarg’a bergen juwabinan usini an’lasaq boladi. Aspan patshalig’ina kiriwimiz ushin, ha’r birewimiz balalarday boliwimiz kerek eken. Balalar qanday qa’siyetlerge iye? Kelin’, sizler menen usilar haqqinda da oylap ko’remiz. Birinshiden, balalar ju’da sada, ne desen’iz ha’mmesine isenedi. Sonin’ ushin ha’m Iyemiz bizlerge balalarday bolin’ dep aytip atir. Sebebi u’lkenlerge bir na’rse tuwrali aytsaq, olar a’lbette sol na’rsenin’ haqiyqat yamasa jalg’an ekenligin tekserip ko’redi.
Balalar bolsa onday emes. Usi bapti uliwma ko’rip shiqsaq, balalardin’ da, qutqariliwg’a erise alatug’inin ko’riwimiz mu’mkin. Geyde jasi u’lken tuwisqanlarimiz balalar ele hesh na’rseni tu’sinbeydi, sonin’ ushin olarg’a Iyemizdin’ ulli isleri haqqinda aytiwimizdin’ onshelli paydasi joq dep aytadi. Biraq Muxaddes So’zi arqali Iyemiz O’zi bul na’rsenin’ kerisin aytip turipti. Du’nyadag’i taniqli ko’plegen Masiyxiy jaziwshilar, wazshilar balalig’inda Iyemizge isenip, Oni o’zlerinin’ qutqarishisi dep ju’reklerine qabil etken.
Demek, ha’r bir du’nyag’a kelgen insan gu’nakar bolip tuwiladi. Sol menen birge balalar da. Qa’dirli tin’lawshilar, kelin’, balalarimizdi ha’m oylayiq. Ku’ni tu’ni olar ushin tinimsiz duwa eteyik. Solay etip, Iyemiz olardin’ ju’reklerin ashadi ha’m tayarlaydi. Doslar, esittiriwimizdin’ son’inda sizlerge bir ayatti oqip bermekshimiz. Bul ayat ha’m Matta kitabinin’ 18 bap 14 ayatinda jazilg’an. “Sol siyaqli, sizlerdin’ aspandag’i A’ken’iz mna kishkenelerdin’ birewinin’ de joytiliwin qa’lemeydi.” Keyingi esittiriwlerimizde ko’riskenshe, xosh saw salamat bolin’ doslar.
