Ayan – bul Qudaydin’ erkin yamasa qanday da bir joqari haqiyqattin’ tan’ qalarli ra’wishte Quday ta’repinen aship beriliwi esaplanadi. Adamlar barqulla Qudaydi biliwge ha’m Oni tu’siniwge ha’reket etken. Biraq, adamlardin’ a’piwayi ha’reketleri ja’rdeminde Qudaydin’ islerin ashiq ko’rip bolmaydi. Birinshi Korinflilerge jazilg’an xattin’ 2 babi 9 ha’m 10 ayatlarinda bilay jazilg’an: “Ko’z ko’rip, qulaq esitpegen, Adamnin’ oyina kirip te shiqpag’an na’rselerdi, Quday O’zi su’yetug’inlar ushin tayarlap qoyipti. Quday buni bizlerge O’zinin’ Muxaddes Ruwxi arqali aship berdi”. Muxaddes Kitap – Qudaydan kelgen ha’m Quday haqqindag’i ayan, sebebi ol Qudaydan shiqqan ha’m Ol haqqinda aytip beredi. Quday O’zi haqqindag’i ayandi O’zinin’ So’zi arqali ha’r birewimizge berip atir.
Misali, Muxaddes Kitaptan minanday ayatlardi oqiwimiz mu’mkin. Yuxan 20 bab 31 ayat. Bul ayatlardan tisqari Luka kitabinin’ 24 babi 27 ayatinda “Solay etip, Iysa Muwsa payg’ambardan baslap, barliq payg’ambar kitaplarinda O’zi haqqinda jazilg’an ayatlardin’ ha’mmesin olarg’a tu’sindirip basladi” – dep aytilg’an. A’lbette bul ayatlar arqali Iyemiz O’zi haqqinda bir neshe jil aldin payg’ambarshiliq etilgen ayanlar haqqinda ha’m usi ayanlardin’ orinlanip atirg’ani haqqinda aytip atir. Quday O’zi haqqindag’i ayandi tiri Muxaddes So’zi bolg’an O’zinin’ Uli Iysa Masiyx arqali beredi. Bul ga’pimizdin’ da’liylin bizler ja’ne Muxaddes Kitap arqali ko’riwimiz mu’mkin.
Misali, Yuxan kitabinin’ birinshi babinda bilay jazilg’an ayatlardi oqiwimiz mu’mkin: “En’ basta So’z bar edi. So’z Quday menen birge edi. So’z Quday edi. En’ bastan-aq Ol Quday menen birge edi. So’z adam bolip aramizda jasadi. Bizler Onin’ ullilig’in, A’keden kelgen, miyrim ha’m haqiyqatqa toli bolg’an jalg’iz Uldin’ ullilig’in ko’rdik”. Budan tisqari, Evreylerge jazilg’an xattin’ birinshi babi birinshi ayatinda “Quday a’yyemgi zamanlarda payg’amlar arqali ko’p ma’rtebe ha’m ha’r tu’rli jollar menen ata-babalarimizg’a so’ylegen edi. Al son’g’i waqitlarda bolsa, Quday bizlerge O’z Uli Iysa arqali so’yledi”. A’lbette Muxaddes Kitapsiz hesh qanday ashiqliq joq. Qudaydin’ So’zi – iyman ha’m o’mirinin’ jalg’iz kemshiliksiz nizami esaplanadi. Bir adam bilay degen eken:
“Eger birew mag’an bir ma’rte o’tirik so’ylese ha’m keyinshelik ol mag’an min’ ma’rte haqiyqatti so’ylese de, og’an qashan iseniwge bolatug’in bilmeymen”. Al Muxaddes Kitap hesh qashan o’tirik so’ylemegen. Bizler Muxaddes Kitapta jazilg’an barliq ga’plerge ha’m ha’r bir so’zlerdin’ joqari ha’m haqiyqat ekenligine toliq iseniwimizge boladi.
