Assalawma a’leykum hu’rmetli tin’lawshilar. Sizler menen efir arqali ushrasip turg’animnan quwanishliman. Kelin’ler bu’gin Quday ne ushin Nux payg’ambardi tan’lag’anlig’i haqqinda so’ylesemiz. Bul tuwrali Jaratilis kitabinin’ 6 shi babtan 10 shi babqa shekemgi bolg’an jerlerinde oqisaq boladi. Du’nyag’a gu’na kirip kelgennen keyin, barliq adamlar gu’na islep Qudaydin’ ashiwin keltirdi. Bulardi ko’rip Quday Nuxqa barliq adamzatti qirip taslawi haqqinda aytqan edi. Biraq Nux ha’m onin’ shan’araq ag’zalari Qudaydi jaqsi ko’retug’in ha’m Onin’ aytqanlarin tin’laytug’in pa’k adamlar edi.

Quday Nux payg’ambarg’a keme sog’iw tuwrali aytqanda ol hesh ekilenbey Qudaydi tin’ladi. Sol waqitlari onday kemeni quriw an’sat emes edi. Sebebi kemege ha’r turli haywanlar siyatug’in ha’m ishinde birge jasay alatug’in boliwi kerek edi. Nuxtin’ bunday isin basqa adamlar ko’rip qanday oylarg’a barg’anin ko’z aldimizg’a keltirsik boladi. Menimshe olardi bir na’rse qiziqtirg’an ha’m Nux payg’ambardan sorag’an boliwi mu’mkin. Nux atirapin’da ten’iz joq bolsa sag’an bunday u’lken keme ne ushin kerek?

Pu’tkil jer ju’zin suw basip hesh bir tiri jan qalmaytug’inligin Jaratqan Iyemiz aytti. Men shan’arag’im menen birge usi kemege kirip qutqarilmaqshiman. Eger qa’lesen’izler kelin’ler ja’rdem berin’ler, sizler ha’m kemege kirip qutqarilasizlar. Bul Nux payg’ambardin’ qasindag’i adamlarg’a aytip atirg’an Xosh Xabari edi. Biraq hesh kim oni tin’lamadi. Kerisinshe, onin’ u’stinen ku’lip og’an isenbedi. Aradan biraz waqit o’tip Qudaydin’ aytqaninday jawin jawip du’nyani suw basti. Menimshe sol waqitta isenbegen adamlar kemenin’ esigin qag’ip Nuxtan aship olardi kirgiziwin iltimas qilg’an. Biraq hesh kim kemenin’ esigin asha almaytug’in edi, sebebi oni Qudaydin’ O’zi jawg’an edi. Nux ha’m onin’ shan’arag’inan basqa sirtta qalg’anlar suwdin’ astinda qalip ketti.

Sebebi olar Nux payg’ambardin’ so’zine isenbegen edi. Ha’zirgi ku’ni ha’m sog’an uqsaydi. Adamlarg’a Iysa Masiyx haqqinda aytqanimizda olar isenbeydi. Bazi adamlar bolsa ku’ledi. Esin’izde bolsa kemenin’ tek g’ana bir esigi bar edi, sol esikten Nux ha’m onin’ shan’arag’i kirip aman qalg’an edi. Duris olar ha’m gu’nali adamlar edi. Biraq ha’mme waqit Quday menen birge ju’retug’in edi. Olar kemege kiriwge sazawar edi. Quday menen birge ju’rgen adam gu’nanin’ a’qibetin biledi. Beyishke bariwimizdin’ ha’m tek g’ana bir joli bar ol ha’m bolsa Iyemiz Iysa Masiyx. Bayliqlar hesh qashan adamdi qutqara almaydi. Kemege kirip qutqariliw ushin Qudaydin’ aldinda tis sho’gip gu’nalarimiz ushin keshirim sorawimiz kerek. Bizlerdi keshiriw ushin Jaratqan Iyemiz ha’mme waqit tayar.

Qa’dirli doslar kelin’ler ju’reklerimizdi tas qilip qoymay, oni Iyemiz ushin tayarlayiq ha’m ashiq bolayiq. Nux payg’ambarg’a uqsap Qudayg’a sadiq bolayiq ha’m ha’r bir So’zi menen jasayiq. Doslar usinin’ menen bu’gingi efirimizdi juwmaqlaymiz. Ja’ne ushrasqansha saw-salamat bolin’.