Assalawma a’leykum qa’dirli doslar, sizler menen saw-salamat ushrasip turg’animizdan ju’da’ quwanishlimiz. Ha’mmen’izdin’ shan’araqlarin’izg’a tinishliq, amanliq tilegen halda, bu’gingi temamizdi baslaymiz. Hu’rmetli doslar, Muxaddes Kitapti Qudaydin’ So’zin u’yreniwdi baslag’anin’izda, en’ basli duwa menen baslawdi jaqsi bilesiz. Odan keyin sorawlarg’a juwap izlep baslaw kerek. Birinshi da’rriw qilatu’g’in isin’iz bul, jasirin ma’nisi boliwi mu’mkin dep basqa ma’nilerdi izlemen’.

Muxaddes Kitapta jazilg’aninday aniq, tu’sinerli bolg’an ma’nisin, tu’siniwge ha’reket etin’. Bul kitap jalg’an gurrin’ler yamasa adamlar haqqinda jazilmag’an. Kerisinshe, olar bar bolg’an adamlar ha’m bolg’an waqiyalar haqqinda jazilg’an. Misali, Kolosalilarg’a jazilg’an xat, tariyxiy adam ta’repinen tariyxiy adamlarg’a jazilg’an. Tap ha’zirgi waqitta adamlar bir-birine xat jazg’aninday, sol zamannin’ adamlari ha’m bir-birine xatlar jazip turg’an. Kolosalilarg’a jazilg’an xatti u’yreniwdi baslag’anin’izda, xattin’ uliwma mazmunin tu’siniwge ha’reket etin’.

Odan keyin xattag’i ha’r bir bo’limdi bo’lek u’yreniwge ha’m ha’r bir bo’limdi jaqsiraq tu’siniwge ha’reket etin’. Bul Kolosalilarg’a jazilg’an xattag’i ayatlarda avtor o’zinin’ kirisiw so’zin jazg’an. Sol sebepten olardi bir bo’lek etip aliwimiz mu’mkin. Da’slep Muxaddes Kitapti oqip bolg’annan son’ oni baqlawimiz kerek. Baqlaw neden ibarat boliwi mu’mkin? Baqlaw bul tu’pten oqiw bolip tabiladi. Bul jerde ne dep aytilg’an? Bul jerde qanday so’zler jazilg’an? Olar ne demekshi? Da’slep bo’limlerdi toliq oqip, u’yrenip, son’ basli mazmunin tu’sinip alayiq.

Odan keyin “bo’limlerde neler ashiq, tu’sinerli etip jazilg’an”? dep o’zin’isten sorap ko’rin’. Bo’limde ta’krarlang’an so’zlerdi yamasa frazalardi izlen’. Esin’izdeme? Tez-tezden ta’krarlanip kelgen so’zler yamasa frazalar ko’binshe sol bo’limnin’ ne haqqinda ekenligin, yag’niy bo’limnin’ temasin belgilep beredi. Eger xattag’i bir tema basqa bo’limlerde ha’m tez-tez ta’krarlansa, ko’binshe xattin’ uliwma temasi tap usi tema bolip shig’adi. Bo’limde ta’krarlang’an so’zler yamasa pikirler barma?

Neler ta’krarlanip kelgen? Demek, bizler tek g’ana so’zlerdin’ ta’krarlang’anlig’ina qaramay, tiykarg’i pikiri ha’r qiyli so’zlerdin’ ko’rinisinde ta’krarlang’anlig’ina itibar beriwimiz kerek. Bo’limde tu’sinersiz so’zlerdi ushrattin’izba? Bul so’zlerdin’ ma’nisin kontekstqa qarap turip tu’siniwge bolama? Kontekstqa qaran’. Mna so’zdin’ ma’nisi ne dep oylaysiz? Sonda da ta’jiriyben’iz jetpese, o’zin’izden de ta’jiriybelirek tuwisqanlarin’izdan sorap ko’rip juwaplar aliwin’iz mu’mkin. En’ a’hmiyetlisi, ha’mme waqit duris juwap izlewge ha’reket etin’. Alg’an juwaplarin’izdi ja’ne tekserip ko’riwge hesh erinben’. Sonin’ menen qa’dirli doslar, temamizdi juwmaqlamaqshiman. Bizlerdin’ internet ma’nzilimiz: www.danaliq.com xosh saw-salamat bolin’.