Assalawma a’leykum hu’rmetli tin’lawshilar. Sizler menen efir arqali ushrasip turg’animizdan minnetdarmiz. Doslar, kelin’, Muxaddes Kitapti u’yreniwdi dawam etemiz. Muxaddes Kitap basinan baslap tap aqirina shekem bir kitaptay bolip oqiliwin ha’r birewimiz jaqsi bilemiz. Sebebi Quday onin’ jalg’iz avtori. Muxaddes Kitap bizlerge pu’tin ha’m aniq etip berilgen. Muxaddes Kitap hesh qashan o’zgermegen ha’m o’zgermeydi, sebebi onin’ avtor jaratiwshisi jalg’iz Quday bolip tabiladi. Hu’rmetli tin’lawshilar, eger Zabur 118 bap 89 ayatin oqip ko’rsek “Jaratqan Iye, so’zin’ ma’n’gi, Ol ko’klerde bekkem turadi” degen a’jayip so’zlerdi oqiymiz.

Muxaddes Kitap – ol ha’r birewimiz ushin jazilg’an Qudaydin’ jeke xati desekte boladi. Bul o’mirimizde alatug’in ha’r qanday xatlardan ulli ha’m en’ a’hmiyetlisi dep ayta alamiz. Qa’dirli doslar, bul jerde bir soraw tuwiladi. Ne ushin siz ha’m men ushin Muxaddes Kitapti oqip, u’yreniw sonshelli a’hmiyetli dep oylaymiz? Eger bul sorawg’a o’zlerimiz juwap beretug’in bolsaq, juwabimiz bilay boladi. Muxaddes Kitap – bul basqa kitaplardan qimbat baxali, o’zgeshe kitap, Ol har qanday kitaplardan ayirilip turadi. Sebebi tek g’ana bul Muxaddes Kitap bizlerge Quday haqqinda aytadi, dep juwap beremiz. Muxaddes Kitap, Quday bizler haqqimizda ne oylaytug’inin ha’m Onin’ pikirinshe bizler ko’birek nege mu’ta’j ekenimizdi bizlerge ayatdi. Muxaddes Kitap ju’da a’hmiyetli, sebebi Ol ha’r birewimizge berilgen Qudaydin’ xati, yag’niy ju’rekten jazilg’an So’zi!

Hu’rmetli doslar, kelin’, Muxaddes Kitapti birge u’yreneyik ha’m ol ha’r bir jer ju’zinde jasap atirg’an adamlarg’a neler haqqinda aytip atirg’anin tu’siniwge ha’reket etemiz. Quday o’zi kim? Ol qanday? Bizler Oni qalay biliwimiz mu’mkin? Bizler Qudaydi Onin’ O’zinen bilip alamiz. Bunin’ ushin, Ol O’zinin’ So’zinde O’zi haqqinda ne degenin oqip, tu’sinip aliwimiz mu’mkin. Ne ushin bizler Quday haqqinda biliwimiz lazim? Sebebi Qudaydin’ O’zi bizlerge Ol haqqinda biliwimiz ushin imkaniyat berip atir. A’lbette, bul imkaniyattin’ barlig’i Muxaddes Kitap arqali. Mine sonin’ ushin da Muxaddes Kitapti u’yreniwimiz lazim eken. Quday Ol haqqinda biliwimizdi qa’leydi! Eremiya kitabinin’ 9 bap 24 ayatinda Quday bilay deydi: “Maqtanatug’in adam Meni tu’singeni ha’m tanig’ani menen, Jer ju’zinde su’yispenshilik, A’dalat ha’m tuwriliqti ju’zege asiratug’in, Jaratqan Iye Men ekenim menen maqtansin. Bulardan Men ra’ha’tlenemen, – deydi Jaratqan Iye”.

Qudaydi biliw, bul bizler a’melge asiratug’in ha’m en’ su’yikli na’rselerimizden de a’hmiyetlisi bolip sanaladi. Tek g’ana Quday ma’n’gi. Ha’mme na’rsenin’ baslaniwi bar. Quday Ol sheksiz, ma’n’gi! Du’nyada qanday da bir na’rse payda bolmasinan aldin, Quday bar bolg’an, ha’zir de bar ha’m ha’mme waqit boladi. Qudaydin’ joq bolg’an waqiti joq. Onin’ baslaniwi joq. Ol jaratilmag’an edi. Ol ha’mme waqit jasag’an. Ol ha’mme waqit bar bolg’an ha’m sonday boladi. Quday bolmag’an waqit hesh qashan bolmaydi. Ol ma’n’gi. Ol ha’mme waqit bar! Doslar, kelin’, usi jerde sa’wbetimizdi juwmaqlap, sizler menen ha’zirshe xoshlasamiz. Xosh saw-salamat bolin’.