U’yin’izde tinishliq bolsin, hu’rmetli doslar. Qa’dirli tin’lawshilar, usi bizlerge ajratilg’an qisqa waqit ishinde sizler menen Muxaddes Kitap haqqinda so’ylespekshimiz. Ha’r birimizge danaliq tuwri Jaratqan Iyemizden beriledi. Dana boliwdin’ birinshi qa’demi Qudaydin’ So’zin u’yreniwden baslanadi. Ko’pshiligin’izdin’ u’ylerin’izde Muxaddes Kitap bar dep oylaymiz. Bul ju’da jaqsi.

Eger bizler oni shkafimizdi bezew ushin yamasa kitaplarimizdin’ sanin ko’beytiw ushin qoyg’an bolsaq, onda bizlerge Onin’ hesh qanday paydasi joq. Bul kitapti oqiwimizdin’ maqseti, Quday ha’r birimizdin’ o’mirlerimizge so’ylewin qa’leymiz. Bunin’ ushin Jaratqan Iyemizden Muxaddes So’zin’di u’yret, ayatlar arqali o’mirime kerekli na’rseler haqqinda so’yle dep, Odan sorawimiz lazim.

Siz Muxaddes Kitapti endi u’yreniwdi baslag’an bolsan’iz, Oqiwdi to’rt Xosh xabarlardin’ birewinen baslawin’izdi ma’sla’ha’t beremiz.

Oqig’an gezin’izde sizge gey bir jerleri tu’siniksiz boliwi mu’mkin, ol gezde hesh ha’m ta’shwishlenben’ler. Tu’siniksiz bolg’an jerin belgilep ketin’, ha’m oqiwda dawam etin’. Keyinshelik ta’jiriybeli adamnan sol tu’sinbegen jerin’izdi sorap bilip aliwin’iz mu’mkin. Pu’tkil kitapti bir jil dawaminda oqip shig’iwdi aldin’izg’a ma’qset etip qoyin’. Bunin’ ushin Muxaddes Kitaptin’ baplarin bo’lip oqiytug’in bolsan’iz onin’ kontekstina da itibar berin’. Muxaddes Kitapti ila’ji bolsa ha’r ku’ni oqin’, a’sirese azanda oqig’anin’iz jaqsi.

“Eger ku’n boyi shaytan menen ushrasiwdi qa’lemesen’, azanda Quday menen ko’ris.” Degen eken bir adam. Sebebi Qudaydin’ So’zi ha’r birimiz ushin ruwxiy aziq sanaladi. Ha’zirgi ku’nde Muxaddes Kitapti tez oqiw ushin tu’zilgen jaqsi ko’plegen rejelerdi tapsan’iz boladi. Eger usi rejeler tiykarinda oqip u’yrensen’iz og’ada jaqsi.

Bul kitapti bir ha’pte dawaminda oqip shig’aman dep aytiwi mu’mkin. Biraq ma’qset tez oqip qoyiwda emes, Kitapta bizlerdin’ o’mirlerimiz ushin neler aytilip atirg’anina itibar beriw ha’m o’mirimizde qollaniw esaplanadi. Ha’r ku’ni eki yamasa u’sh baptan oqisan’iz jeterli dep oylaymiz. Oqiwin’izdan aldin bir neshe sorawlardi berip ko’rin’ ha’m usi sorawlar tiykarinda oqin’. Bul bizlerdin’ sizlerge beretug’in kishkene ken’esimiz. Biraq ha’r birimizdin’ oqitiwshimiz bul Iyemiz Iysa.

Muxaddes Kitaptag’i ayatlardi yadlaw ha’m bizlerdin’ o’mirlerimizde u’lken ha’m a’hmiyetli rol oynaydi. Usi yadlag’an ayatlarimiz arqali Iyemiz bizlerge tuwri jol ko’rsetedi. Ha’r birimiz o’mirde adaspay ju’riwimiz ushin bizlerdin’ jol baslawshimiz bolip tabiladi. “Sag’an qarsi gu’na islemewim ushin, Ju’regimde saqladim so’zlerin’di” dep Zabur kitabinin’ 118:11 ayatinda jazilg’an. Sonin’ menen qa’dirli tin’lawshi doslarimiz Muxaddes Kitap haqqindag’i esittiriwimizdi juwmaqlaymiz. Sizler menen ja’ne ushirasqansha saw-salamat bolin’.