Assalawma a’leykum qa’dirli doslar. Sizlerdey doslarimiz bar ekenine minnetdarmiz. Bu’gin sizler menen mikrofon aldinda Sarbinaz. Jan’a iymang’a kelgen tuwisqanlarimizdin’ da ju’reklerinde, ele Qudaydi tanimaytug’in doslari ushin, Aspandag’i A’kemizdin’ miyrim-sha’pa’a’tin izlewdi qa’lewlerin oyatiw ha’r birewimizdin’ waziypalarimizdin’ birewi boliwi kerek degen pikirdemiz.

Buni bizler sha’kirtlik dep te aytiwimiz mu’mkin. Ha’r bir isti baslamasimizdan aldin a’lbette ibadat etiwdi a’det etip alayiq. A’sirese, sha’kirtlerin’iz ushin bul ju’da a’hmiyetli. Duwa etkenimizde bilay dep duwa eteyik: “Bizlerdin’ miyrim’sha’pa’a’tli Aspandag’i A’kemiz, bizler Senin’ miyrim-sha’pa’a’tin’e isenemiz. Bizler ha’r ku’ni Senin’ keshirimin’e mu’ta’jbiz. Bizlerdi keshirgenin’ ushin raxmet aytamiz. Bizlerdi shaqirg’anin’ ushin raxmet. Doslarimiz da Senin’ miyrim-sha’pa’a’tin’e iye boliwina ja’rdem ber. Senin’ miyrim-sha’pa’a’tin’di olarg’a ko’rsetiwimizge ja’rdem ber. Olarg’a jaqsi ko’rsete alayiq. Bul du’nyadan elege shekem la’zzetlenip jasap atirg’an qon’silarimizg’a, doslarimizg’a ha’m du’nyag’a qarata Senin’ miyrim-sha’pa’a’tin’di da olarg’a bolg’an da’rdin’di ko’rsete alatug’in ju’rek bergeysen’.

Ha’mme waqit Senin’ aldin’da kishipeyil bolip jasawimizg’a ja’rdem ber. Ha’r birewimizdin’ o’mirimizde O’zin’di ja’nede ko’birek aship bergeysen’”. Doslar sizlerge tag’i Luka kitabinin’ 15 bap 1:32 ayatqa shekem jerlerin oqip shig’iwdi ma’slahat beremiz. Usi bapta jazilg’anlar haqqinda pikirlew ha’r bir insan ushin ju’da paydali ekenine isenemiz.

Doslar usi jerde bir na’rseni ko’z aldin’izg’a keltirin’. Siz a’kesiz, balan’iz mal-mu’lkin’izden o’zine tiyislisin alip sizden uzaq ma’mleketke ketken, usinday waqitta siz qanday awxalg’a tu’sken bolar edin’iz? A’lbette, ha’r bir a’ke o’z perzenti ushin qatti qayg’iradi. Ila’ji barinsha olardin’ awxalinan xabar aliwg’a ha’reket etedi. En’ a’hmiyetlisi perzentleri saw-salamat ja’ne u’yine qaytiwin ha’r bir ata-ana qa’leydi.

Quday A’kemiz de insanlar haqqinda tap usinday oylap, qayg’iradi, ba’lkim odan da ju’z ese ko’birek qayg’iradi. Sebebi ha’r bir insandi biyishte O’zinin’ aldinda ko’riwdi qa’leydi. Ja’ne bir na’rseni ko’z aldimizg’a keltirip ko’reyik, siz a’kesiz ha’m balan’iz benen 3 jil aldin xoshlasqan edin’iz ha’m sondan berli onin’ jasawi haqqinda ha’r kimnen ha’r qiyli ga’pler esitesiz.

Naqilg’a tiykarlanip balan’iz awir o’mir ko’rip atirg’ani, mal-mu’lkin jo’nsiz sawip jibergeni ha’m endi haywanlardi bag’ip ju’rgeni haqqinda esitesiz. Perzentin’iz haqqinda usinday xabarlar kelip turg’an waqitta qanday awxalg’a tu’semiz? A’lbette, o’z perzentlerimizdi usinday qiyin ha’m awir jag’daydan qutqariw ushin barliq ku’shimizdi saliwg’a tayar bolamiz. Solay eken, hu’rmetli tin’lawshilar, Quday insan haqqinda da usinday da’rejede yag’niy odan da ko’birek qayg’iratug’inlig’in umitpayiq. Ha’m bular haqqinda doslarimizg’a da aytayiq. Sebebi bizler doslarimizdi jaqsi ko’remiz ha’m hu’rmet etemiz.