Qaraqalpaq xalqinin’ bir jaqsi a’deti bar. U’yine miyman kelse o’zinde bar jog’in olardin’ aldina a’kelip qoyadi. Miymannin’ jaqsi otiriwi ushin ko’rpeshe to’sep, hu’rmet etedi. Miymandi bir kese shay yamasa awqat pisirip, jegizbey jibermeydi. Bul bizlerdin’ en’ jaqsi a’detlerimizden biri bolip tabiladi. O’ytkeni xalqimiz “Miyman atan’nan ulli” deydi. Bul u’yin’e kelgen miymandi ila’ji barinsha jaqsi siyla degendi bildiredi.
Muxaddes Kitapqa qaraytug’in bolsaq Ibrayim payg’ambar bizlerge miyman ku’tiwdi ko’p jillar aldin ko’rsetip o’tkeninin’ gu’wasi bolamiz. Ol perzentsiz bolg’an waqitlarinda, perzentli boliwin aytiwg’a kelgen perishtelerdi a’jayip tu’rde ku’tip jibergen edi. Olardi taza ha’m salqin jerge otirg’izip, birinshi bolip qollarinan suw alip, son’ awqatlandirg’an. Olar ushin o’zinin’ padasinan en’ jaqsi maldi soyip, mazali ha’m toyimli awqat pisirip siylag’an. Usi arqali miymanlardi qolimizdan kelgeninshe quwanish penen ku’tip aliwimiz kerek ekenin bilemiz.
O’ytkeni Muxaddes Kitapta bilay jazilg’an: “Miymanshiliqti umitpan’lar: geybir adamlar miymanlarimdi jaqsi ku’tip jibereyin dep, bilmey perishtelerdi de ku’tip jibergen”. Qa’dirli doslar, sizler de Ibrayim atamiz siyaqli tuwisqanlarimizdi ha’ptenin’ qa’legen ku’ni miyman qiliwin’iz mu’mkin. Usi arqali Iyemiz Iysa Masiyxti olar menen birgelikte ullilawin’iz da mu’mkin boladi. Sebebi ha’zirgi qiyin bir da’wirde ibadatxanada ushrasiw qiyin bolg’anlig’i ushin u’yimizde ushirasip, Qudaydi alg’islawimiz mu’mkin. “Kim de kim mna balani Menin’ atim menen qabil etse, Meni qabil etken boladi” dep aytadi Muxaddes Kitap.
Demek, tuwisqanlarimizdi u’yge shaqirip birgelikte ushirasip, Qudaydi ullilasaq, u’yimizde tek g’ana tuwisqanlarimizdi emes, al Iysa Masiyxti ku’tken bolamiz. Bizler ha’r birewimiz nizam boyinsha u’yimizge qa’legen adamdi miymang’a shaqiriw huquqina iyemiz. Olardi u’yge shaqirg’animizda bizlerge danaliq kerek boladi. Bizler hesh qanday jiynalis ushin emes al ba’lkim miymanshiliq sipatinda miyman shaqirdiq. Geybir waqitlari tuwilg’an ku’nlerimiz ya bolmasa qanday da bir mereke sebepli doslarimizdi mira’a’t etkendey. Miymanshiliqti ha’r sapari ha’r qiyli u’ylerde qiliwimiz da mu’mkin. Bu’gingi qiyin bir da’wirde Quday bizlerge usinday imkaniyat berip atir.
Doslar, kelin’, endi jiynalis emes ba’lkim miymanshiliq etip tuwisqanlarimiz benen ushirasip, Qudaydin’ So’zin bo’lisip turamiz. Bir ayda bir ma’rte bolsada barliq miymanlar menen kafe yamasa ibadatxanadama ushirasip olardan hal awhal sorasip turamiz. Usi miyman ku’tiw xizmetimizde Qudayim O’zi ha’r birewimizge danaliq bersin qa’dirli tuwisqanlar.
