Assalawma a’leykum qa’dirli doslar. Burinnan Quday adamlardin’ tek g’ana Og’an tabinip, iseniwin ha’m tek g’ana Odan ja’rdem ku’tiwin qa’legen. Ha’m bul qa’lewin O’zi tan’lag’an adamlari arqali xaliqqa malum etken. Izrail xalqi Misirdan alip shig’ilg’annan son’ 40 jil sho’listanda ju’rdi. Bul waqit dawaminda Olar Quday menen birge qanday mu’na’sa’bette boliwdi, Og’an qanday tabiniwdi bilip alg’an. Quday olarg’a O’zinin’ jolinda tuwri ha’m duris ju’riwi ushin ja’rdem beretug’in on nizamdi bergen edi. Biraq sog’an qaramay Izrail xalqinin’ geybirewleri elege shekem butlarg’a isenetug’in edi. Usinday adamnin’ birewi Efrayim urpag’inan bolg’an Mixa atli bir adam edi.

Mixa Efrayimnin’ tawli u’lkesinde jasaytug’in edi. Onin’ Quday haqqindag’i pikirleri, isenimi a’tirapindag’i xaliqlardin’ ta’sirinde o’zgerip ketken edi. Ol butlarg’a ha’m Qudayg’a isenetug’in edi. Tek g’ana Qudayg’a iseniw kerek ekenligin esinen shig’arip jibergen. Usi aralasip ketken isenimi oni Qudaydan uzaqlastirip, gu’nag’a apardi. Bir ku’ni ol apasinin’ pulin urladi. Apasi pulin taba almay, uri adamdi g’arg’ag’an edi. Muxaddes Kitapta jaziliwinsha, nahaq g’arg’is sol adamg’a jetip barmaydi. Biraq Mixa etken isi ushin g’arg’is aldi. Kelin’, bul haqqinda Muxaddes Kitapta ne aytilg’anin oqip ko’remiz: “Bir ku’ni ol apasina bilay dedi: – Apa, esin’izdeme 1100 gu’mis tiyinlerin’izdi urlatip alg’an edin’iz? Sol waqitta urini aldimda g’arg’ag’an edin’iz. Mine, sol gu’mis tiyinlerin’iz. Olardi men alg’an edi”. Apasi bul gu’mislerdi zergerge aparip, onnan bir jonilg’an ha’m bir quyma but isletti. Son’ bul butti Mixanin’ u’yine qoydi.

Butlar hesh qashan hesh kimge jaqsiliq a’kelmegen. Mixag’a da jaqsiliq a’kelmedi. Ol usi but arqali jarilqanip, jumislarim ju’risip ketedi dep oylag’an edi. Usi ma’qsette bir levi urpag’inan bolg’an adamdi u’yine alidirip, ruwxaniy etip qoydi. Biraq Quday oni butlarinan azat etiwdi qa’ledi: “Bul waqiyalar bolip o’tken da’wirde Izrailde patsha joq edi. …Alti ju’z qural jaraqlang’an Dan a’skerleri darwazanin’ aldinda turg’an edi. Jasirin tu’rde ju’rgen bes a’sker tuwri ishke bastirip kirip, ruwxaniylerdin’ kiyimlerin, ha’m gu’mis penen oralg’an butti alip …ketti”. Ne ushin bunday boldi? Mixa Qudaydin’ jarilqawin ku’tip ju’rgen edi-g’o?

Geyde bizler de Qudayg’a baylanisli bolmag’an, Qudayg’a maqul bolmag’an na’rselerge isenemiz, solar arqali Qudaydin’ jarilqawin, jaqsilig’in u’mit etemiz. “Solay islesem, Quday menin’ ta’repimde boladi”, – dep oylaymiz. Biraq bu’ytip pikirlewden aldin, Qudaydi jaqsiraq bilip aliw kerek eken. Qudaydi jaqsi bilmey turip, Og’an ne maqul ekenin yamasa ne maqul emes ekenin bile almaymiz. Mixanin’ qa’tesi de tap usi edi. Ol Quday menen gu’nani birge alip baratirg’an edi. Qudayg’a maqul bolmag’ani ushin da u’yindegi butlarinan ayirildi. Bunin’ tu’binde Qudaydin’ jaqsi niyeti bar ekenligin Mixa bilmeytug’in edi. Doslar, basimizg’a tu’sken bizler jamanliq dep oylag’an na’rse negizinde bir jaqsi ma’qset penen etilgen boliwi mu’mkinligin bir oylap ko’reyik.