Assalawma a’leykum, qa’dirli tin’lawshi doslar. Bul guwaliqti jaqinda bir imanli adamnan esittim. Bul sol adamnin’ o’mirinde bolip o’tken waqiya. Bul waqiya jaqin arada bolip o’tken. Bul adam o’z guwalig’in bilay dep aytip basladi: “Jaqinda qizim menen supermarketke bardim. Qizim menen kerek na’rselerimizdi alip shiqtiq. Esikten shig’ip baratig’animizda, bir adam menin’ mashinam turg’an jerge o’zinin’ mashinasin qoyajaq bolip atirg’anin ko’rdim. Jaqinda u’shke kirgen qizima “tez mashinag’a otir! – dedim. Bizlerdin’ mashinamizdin’ ornina basqa adam o’zinin’ mashinasin qoyajaq” – dedim qizima.

O’zim de doslarim menen kafede ushirasiwima asig’ip atirg’an edi. Alg’an na’rselerimizdi artqi oring’a qoyip, esikti jawdim ha’m arqadan sabirsizliq penen berip atirg’an signalg’a asig’ip tez rulge otirdim. “Ne ushin bu’gin ha’mme asig’ip atir?” – dep oyladim ha’m qa’wipsizlik qayisin taqdim. Turg’an jerimnen shig’ip mashinalardin’ toqtaytug’in jerin kesip o’ttim, bir ta’repleme ha’reket etiletug’in tar joldan ko’shege shig’iw ushin ruldi on’g’a burdim. Oyim arqadag’i mashinada qaldi ma yamasa doslarim menen kafege ketti me, qullasi ju’riwim kerek bolmag’an ta’repke ju’rip ketippen.

Aldimnan bir mashina mag’an qarap tez kelyatirg’anin ko’rip qaldim. Ekewimizdin’ du’gisip ketiwimizge az qalg’an edi. Ekewimizde bir waqittin’ ishinde tormozdi bastiq. Asiqqanimnan qizima men qa’wipsizlik qayisin taqpag’an ekenmen. Odan tisqari kafege asig’ippan. Na’tiyjede, ol aldin’g’i aynag’a kelip urildi ha’m o’zinen ketti. Onin’ burninan ha’m awzinan qan ag’ip basladi. Qilip qoyg’an isimnen qatti qorqip kettim. Onin’ qatti urilg’aninan qorqip ketip, Qudayg’a duwa ete basladim: “O Iyem, Qudayim, meni jen’iltekligim ushin keshir! Iltimas, qizima O’zin’ shipa ber! Sennen o’tinip sorayman, og’an hesh na’rse bolmasin. Og’an shipa berego’r, Qudayim!” dep tinbay duwa ettim.

Men qizimnin’ tisleri yamasa murni sing’an boliwinan yamasa en’ jamani – bas miyi jaraqatlang’an boliwi mu’mkinliginen qorqtim. Oni asig’ip tez emlewxanag’a alip bardim. Jol boyi Qudaydan og’an shipa beriwin, o’zimnin’ abaylamag’anligim, qa’temdi moyinlap keshirim soradim. Barg’animizdan keyin qizimnin’ awir jaraqat almag’anin aytti. Tisleri de pu’tin edi, tek g’ana onin’ murni ha’m erni, awzinin’ ishi jarilg’an eken. Qizimdi Qudaydin’ ka’ramatli qollari asrap qalg’anina guwa boldim. Men bolsa o’zim ilayiqli bolmag’an na’rsege iye boldim. O’zimnin’ abaysizlig’im ushin jazag’a ilayiqli edim, biraq bunin’ ornina Qudaydin’ miyrim-sha’pa’atina miyassar boldim.