Qa’dirli doslar, sadiq o’mir – masixiy o’mirdin’ en’ tiykarg’i ta’replerinin’ biri bolip esaplanadi. Haqiyqiy, ma’n’gi quwanishqa iye boliw ushin bizler Masiyxqa ha’mme waqit sadiq boliwdi u’yreniwimiz kerek. Ko’plegen adamlar quwanishli o’mirdin’ sirin hesh qashan tapa almaydi; ha’m sol sebepli olar Iyemiz bizlerdi to’menge tu’sirip qoyg’an, dep oylaydi.
Sadiq o’mir, tawsilmas quwanishlar alip keledi, ha’mde Masiyxqa Sadiqliq o’mirimizdi bereketli etedi, ibadatlarimizg’a juwap alamiz. Bizler Og’an bag’inamiz sebebi Ol bizlerdin’ ishimizde ha’m bizler arqali jasap atir.Masiyxqa sadiqliq bul Onin’ erkine ko’re jasaw ushin sizge imka’n beretug’in, siz arqali basqarilatug’in Onin’ o’miri, Onin’ ku’shi, Onin’ danalig’i, Onin’ baylig’i, Onin’ qu’direti, Onin’ qa’bilyeti ekenligin yadimizda tutip, an’li ra’wishte Og’an tiyisli bolip jasawdi bildiredi.
“Mag’an ku’sh-quwat beretug’in Iysa Masiyx penen birge ha’mme na’rseni isley alaman” (Filipliler 4:13) dep Muxaddes Kitapta jazilg’an. Demek, Qudaysiz qolimizdan hesh na’rse kelmeydi. Insan o’zinin’ ku’sh-qu’diretine su’yenip bir na’rselerdi etiwi mu’mkin, biraq bul uzaqqa barmaydi.
Ne bolg’an jag’dayda da doslar, tu’skinlikke tu’spen’ler. Qudayg’a isenin’. Qudaydan la’zzet alin’, o’mir jolin’izdi Qudayg’a tapsirin’. Iyemizden tinishliq alip, Og’an qaran’. Tinish ha’m bereketli o’mir siri to’mendegilerdi o’z ishine aladi: biliw, orinlaw, qolimizdi beriw, iseniw, la’zzet aliw, tapsiriw, tinishliq aliw ha’m ku’tiw.
Doslar, so’zlerdi Muxaddes Kitaptin’ Rimlilerge jazilg’an xattin’ 6 babi, ha’mde Zaburdin’ 37 baplarin tabip, oqip ko’rin’. Siz Iysa Masiyx penen o’lgenin’izdi bilin’, o’zin’izdi gu’nanin’ aldinda o’lik, Iysa ushin tiri dep esaplan’, o’zin’izdi Qudayg’a tapsirin’, Og’an boysinin’, Quday sizdin’ gu’nalarin’iz ushin to’lem bergenine ha’m ma’n’gi o’mir bergenine isenesiz.
Ne ushin endi gu’nanin’ u’stinen jen’ip shig’iw ushin ku’sh aliwg’a Og’an isenbewimiz kerek eken? Siz Masiyxti isenim menen qabil etkenin’izdi eslen’, solay eken endi siz isenim menen jasawin’iz kerek.
