Assalawma a’leykum hu’rmetli tin’lawshilar. Sizler menen Danaliq radiosinda ushirasip turg’animizdan sheksiz minnetdarmiz. A’lbette xalqimizdin’ a’detlerine qarag’animizda erkek adam shan’araqta ko’p imkaniyatlarg’a iye. Erkek adam ne dese shan’araqta a’dette sol boladi. Misali qiz bala mustaqil o’mirge qa’dem taslag’aninda a’lbette a’kesinin’ qa’lewi boyinsha is ju’rgiziledi. Eger a’kesi qizin kimge tu’rmisqa beriwdi qa’lese ko’binese sol aytqani boladi. Sebebi erkek adamnin’ shan’araqta o’z abiroyi bar. Ba’lkim bul aytqanlarimiz ha’mme waqit ta duris emes shig’ar, biraq ko’p jag’daylarda usinday ekenligin ta’n alip aytiwimiz kerek.

Ba’lkim usi arqali balalarimizdin’ ta’rbiyasi ha’dden tis buzilip ketiwine jol qoyilmaydi. Haqiyqattan da shan’araqta erkek adamnin’ roli u’lken, sonin’ menen birge onin’ ko’p na’rse ushin juwapgershiligi de bar. Erkek adam shan’araqtin’ ruwxiy awxali ushin da Qudaydin’ aldinda u’lken juwapkershilikke iye. Erkek adam ha’mme waqit shan’arag’i, balalari, ha’m hayali ushin ha’mme waqit duwada boliwi lazim. Shan’araqtag’i ma’seleler ha’m ta’rtipsizliklerdin’ kelip shig’iwi ko’binese erkek adamnin’ shan’araqta o’z ornin bilmegeni ha’m Qudaydin’ aldinda o’zinin’ juwapkershiligin sezbegenlikten kelip shig’adi. Quday erkek adamnin’ shan’arag’ina itibarli boliwin ha’m Qudaydin’ So’zi boyinsha shan’arag’in basqariwin qa’leydi.

Muxaddes Kitapta bilay jazilg’an: “U’yin jaqsi basqaratug’in, balalarin boysindira alatug’in, abiroy-itibar arttirg’an bir adam bolsin” bul ga’plerdi elshi Pavel erkeklerge qarata aytip o’tken. A’keler ushin balalarina qarata ju’rekten jaqinlasiw ha’m olardin’ isenimine iye boliwi, ju’da a’hmiyetli. A’sirese, balalar u’lkeygen sayin. Ul balalar o’mirde ushirap turatug’in ha’r tu’rli ga’plerdi o’zinin’ a’kesinen esitip bilgeni maqul. Eger a’ke balasina usi na’rselerdi o’z waqitinda u’yrete almasa, balalar waqiti kelip bulardin’ barlig’in ko’shede u’yreniwi mu’mkin. Ba’lkim bul aytip atirg’anlarimiz bizlerdin’ ma’deniyatimizg’a tuwri kelmewi mu’mkin.

Biraq ha’zirgi zaman tez o’zgerip atir. Bizler bolsa balalarimizdin’ ta’rbiyasi buzilg’anin ku’tip, qarap tura almaymiz. A’keler a’lbette Qudaydin’ so’zin balalar menen, shan’arag’i menen birgelikte oqiw ushin waqit tabiwi lazim. Sebebi ha’r bir erkek adam o’z shan’arag’i ushin Ruwxiy shopan esaplanadi. Itibar berip ko’rsek aspandag’i A’kemiz bizlerdi su’yip o’zinin’ perzentleri etti. Kelin’, biz erkekler de usinday muhabbatti o’zlerimizdin’ shan’arag’imiz, perzentlerimiz ushin ko’rsetemiz. Eger bizler ha’mme waqit Aspandag’i A’kemiz benen baylanista bolsaq bulardin’ ba’rin Aspandag’i A’kemiz biz erkeklerge beredi. Elshi Pavel aytqaninday muxaddes qollarimizdi ko’terip shan’arag’imiz, balalarimiz ushin duwa etemiz. Doslar, kelin’, shan’arag’imiz ushin en’ kerek adam bolamiz.

Eger bizler shin ju’rekten Qudaydi tin’lasaq, Onin’ aytqanlarin orinlasaq. Ha’r qanday jag’dayda da shan’arag’imiz ushin ha’mme na’rsege tayar bolamiz. Bunday erkeklerdi Quday barqulla qollap-quwatlaydi. Sebebi Qudaydin’ O’zi siz benen bizdi jaqsi shan’araq basshisi boliwimizdi qa’leydi. Solay etip bu’gingi esittiriwimiz o’z juwmag’ina jetti. Doslar, keyingi esittiriwimizde ushirasqansha saw-aman bolin’.