Assalawma a’leykum hu’rmetli doslar. Ku’ndelikli irisqimizdi berip atirg’ani ushin Qudayg’a bu’gin shukirshilik bildirdik pe? Qarnimiz toq ha’m u’stimiz pu’tin be? Material irisqimizdi da Qudaydan alip atirmiz, bu’gin ruwxiy aziq-awqatimizdi aldiq pa? Ele u’lgermegen bolsan’iz, bizler menen birge bolin’. Qudaydin’ So’zi menen aziqlaniwdin’ waqiti keldi. Mark kitabi 1 bab. Joqarida aytip o’tken kitap Jan’a Kelisim toparindag’i to’rt Xosh Xabardin’ birinshisi bolip esaplanadi. Onda Iysa Masiyxtin’ tuwiliwi haqqinda aytilg’an. Iysa Masiyxtin’ tuwiliwi bilay boldi: Onin’ anasi Mariyam Yusupke atastirilg’annan keyin, olar qosilmastan burin, Mariyamnin’ Muxaddes Ruwxtan ha’miledar ekenligi bilindi. Onin’ ku’yewi Yusup haq adam bolip, Ma’riyamdi uyatqa qaldirmayin dep, og’an u’yleniwden jasirin tu’rde bas tartiwdi oyladi. Ol usilay oylap ju’rgende, Jaratqan Iyenin’ bir perishtesi onin’ tu’sine enip: “Ha’y, Dawittin’ urpag’i Yusup! Sen Ma’riyamdi o’zine hayaliqqa aliwdan qorqpa. Onin’ ishindegi balasi Muxaddes Ruwxtan.
Ma’riyam Ul tuwadi, Onin’ atin Iysa dep qoyasan’, sebebi Ol O’z xalqin gu’nalarinan qu’tqaradi, – dedi. Bulardin’ ha’mmesi Jaratqan Iyenin’ payg’ambar arqali aldin ala aytqan mina so’zlerinin’ orinlaniwi ushin boldi: “Mine, qiz ha’miledar bolip Ul tuwadi. Onin’ atin Immanuel dep qoyadi.” Immanuel – “Quday bizler menen birge” degen ma’nisti bildiredi.
Yusup u’yqidan turg’annan son’, Jaratqan Iyenin’ perishtesinin’ buyirg’anin islep, Ma’riyamg’a u’ylendi. Biraq Mariyam Ulin tuwg’ansha, Yusup og’an jaqinlag’an emes. Bala tuwilg’annan keyin, ol balanin’ atin Iysa dep qoydi.
Iysa Yahudiyanin’ Beytlehem qalasinda, Patsha Hirodttin’ zamaninda tuwildi. Uzaq waqit o’tpey, Erusalim qalasina ku’nshig’istan juldiz izertlewshiler kelip: – Yahudiylerdin’ jan’a tuwilg’an Patshasi qayaqta eken? O’ytkeni bizler ku’nshig’ista Onin’ juldizin ko’rip, Og’an tabiniwg’a keldik, – dep soradi. Buni esitken patsha Hirod ha’m onin’ menen birge pu’tkil Erusalim qalasi tinishsizlanip qaldi.
Hirod xaliqtin’ barliq bas ruwxaniylerin ha’m diniy mug’allimlerin jiynap alip, olardan Masiyxtin’ qay jerde tuwiliwi tiyis ekenin soradi. Olar bilay dedi: Yahudiyadag’I Beytlehemde. Sebebi payg’ambar arqali minanday so’zler jazilg’an: “Ha’y, Yahuda jerindegi Beytlehem! Yahudadag’i basli qalalardan sen hesh kim emessen’! O’ytkeni Menin’ xalqim Izraildi bag’atug’in Ko’sem Sennen shig’adi”. Son’ Hirod hesh kimge bildirmey juldiz izzertlewshilerdi shaqirip, olardan juldiz payda bolg’an aniq waqitin bilip aldi. Olardi Beytlehemge jiberip: – Barip, Na’reste haqqinda jaqsilap bilip alin’. Oni tapqannan keyin, mag’an abar berin’, men de barip Og’an tabinayin, – dedi. Olar patshanin’ so’zin esitip bolip, ju’rip ketti. Sonda o’zleri ku’nshig’ista ko’rgen juldiz olardin’ aldinda ju’rip, jol ko’rsetti ha’m Na’reste jatqan u’ydin’ u’stinde toqtadi. Juldizdi ko’rgende, olar qatti quwandi.
U’yge kirip, Na’resteni ha’m Onin’ anasi Ma’riyamdi ko’rdi de, Na’restenin’ ayag’ina jig’ilip, Og’an tabindi. O’zlerinin’ g’aziyne idislarin aship, Og’an altin, ladan ha’m mirra degen xosh iyisli zatlardi siyg’a berdi. Olar Hirodqa qaytip barmaw haqqinda tu’slerinde eskertilgenlikten, basqa bir jol menen o’z ellerine qaytip ketti.
Juldiz izertlewshiler ketkennen keyin, Jaratqan Iyenin’ bir perishtesi Yusuptin’ tu’sine enip: “Ornin’nan tur da, Na’reste menen anasin alip Misirg’a qash! Sag’an o’zim xabar bermegenimshe, sol jerde bol! Sebebi Hirod Na’resteni o’ltiriw ushin izlemekte, – dedi.” Yusup turdi da, Na’reste menen anasin alip, tu’n ishinde Misirg’a qaship ketti. Hirodttin’ o’limine shekem sol jerde boldi. Solay etip, Jaratqan Iyenin’: “Ulimdi Misirdan shaqirip aldim”, – dep payg’ambar arqali aldin ala aytqan so’zleri orinlandi.
