Assalawma a’leykum doslar. Sizler menen esittiriwimiz arqali saw-salamat ushirasip turg’animizdan quwanishlimiz. Qa’dirli tin’lawshi tuwisqanlar bu’gin sizler menen kontfliktlerge sheshim tabiw haqqinda pikirlespekshimiz.

Kontflikt waqtinda hu’jim jasaw tek g’ana ku’shli ha’m o’zine isengen adamlar ta’repinen emes, al ku’shsiz, qorqaq ha’m o’zine isenbegen adamlar ta’repinen ha’m keliwi mu’mkin. Bazi bir urislar ha’m kelispewshilikler ha’tteki sudlasiwg’a shekem ha’m alip baradi. Eger bizler sudlasiwg’a shekem alip barmasaq jaqsi bolar edi.

Bazi adamlar dushpanlarina ku’sh isletiw yamasa qorqitiw arqali olardi jen’iwge ha’reket etedi. Bunday ha’reketler ha’mme waqit urislardin’ teren’lesip ketiwine alip keledi. Kelispewshilikler waqtinda jen’ip shig’aman dep, bazi bir adamlar bir-birin o’ltiriwgede baradi. Bazi adamlar onday is qilmasada, ju’reklerinde o’kpe, ashiw ha’m zulim saqlap ju’redi. Bular adamda ha’r qiyli emotsional ha’m fizikaliq keselliklerdi keltiriwi mu’mkin. To’mende eki ta’rep ushin ha’m qolay, kelispewshiliklerdi hal qiliwdin’ bir neshe jollari keltirilgen. Birinshisi bul a’lbette itibar bermew.

Bazi a’hmiyetsiz ha’m kishkene kelispewshiliklerdi tinish, itibar bermey ha’m sol adamdi keshiriw menen hal qiliwimiz mu’mkin. Ekinshi joli, eger sizge qilg’an azari awir bolsa oni itibarsiz qaldirip yamasa tan alip, ashiq ha’m isenerli etip so’ylesiw arqali ha’m hal qiliwin’iz mu’mkin. So’ylesip atirg’an waqtin’izda tartispay, urispay ha’m bir-birin’izdi ayiplamay so’ylesiw ha’m dana adamlardin’ qollanatug’in usillarinin’ biri bolip tabiladi. Aqshag’a, mal-mu’lkke tiyisli bolg’an ma’selelerdi eki ta’rep bir-birinin’ razilig’i menen kelisken halda hal qiliwi kerek.

Eger urislardi o’zlerin’iz hal qila almayatirg’an bolsan’iz, onda “ja’rdemshi” jollarinan paydalansan’iz boladi. Bul o’z-ara kelisken halda eki yamasa bir neshe ken’esler ha’m ja’rdem bere alatug’in adamlardi shaqiriw boladi. Adamlar olarg’a sorawlar ha’m ken’esler berip urislarin hal qilip jarasiwg’a ja’rdem beredi.

Biraq qanday qarar qabil qiliw – urisip atirg’an adamlardin’ o’zlerine qoyip beriledi. Eger eki ta’reptin’ birewi bir qararg’a kele almayatirg’an bolsa, da’lillerdi esitip ma’selege sheshim tawip qarar shig’aratug’in bir neshe adamlardi saylawin’iz mu’mkin. Qa’dirli tin’lawshi doslar bunday kelispewshilikler ha’m urislar o’mirlerin’izde bolmasin, bolip qalsada olardi tinishliq ha’m su’yispenshilik arqali hal qilasiz dep u’mit etip sizler menen xa’zirshe xoshlasamiz. Pikirlerin’iz yamasa sorawlarin’iz bolsa bizlerdin’ www.danaliq.com ma’nzilimizde qaldirsan’iz boladi.