Assalawma a’leykum qa’dirli tuwisqanlar. Bu’gingi Muxaddes Kitap sabag’imizdi bir ayat penen baslasaq. “Sonliqtan eger de sen qurbanlig’in’di qurbanliq oring’a alip kelgenin’de, tuwisqanin’nin’ sag’an o’kpeli ekeni sol jerde esin’e tu’sse, qurbanlig’in’di sol jerde, qurbanliq orinnin’ aldinda qaldirip, A’weli tuwisqanin’a barip, Onin’ menen jarasip al!” (Matta 5:23) Yamasa keyingi ayatti esitin’: “Sebebi Quday bizlerdi O’zinin’ g’a’zebine emes, al Iyemiz Masiyx arqali qutqariliwimiz ushin tayinladi” (1 Salonikalilar 5:9). Geybir waqitlari kewlimizdi sonshelli teren’ awirtqaninin’ sebebinen qapashiliq o’mirimizdi pu’tkilley o’zgerttirip jiberedi. O’zlerimizdi kemsitilgendey sezemiz, ashiwlanamiz, ya bolmasa ha’mme na’rselerge ha’m qarim-qatnaslarg’a biyparwaliq penen qaray baslaymiz. Bazi waqitlari qapa qilg’an adamdi keshiriw naduris, a’dilsizliktey bolip tu’yiledi.

Geyde jaqin jaqsi ko’rgen adamin’izdi qatti qapa qilip qoyadi. Bir hayal ku’yewin qapa qilg’an tanisina qarata kewlinde ko’p waqitqa shekem qapashiliq saqlap ju’rdi. “Meni qapa qilg’an adamdi keshiriw men ushin qiyin emes – deydi ol, – biraq ku’yewimdi qapa qilg’an adamdi keshiriwge haqqim joq, dep bilemen”. Ku’ndelikli o’mirimizde ushrap turatug’in arzimaytug’in qapashiliqlar ushin bizler basqalardi an’satqana keshiremiz ha’m o’z na’wbetinde bizlerdi de keshiredi. Misali ushin, kimdir ayag’imizdi bilmey basip qoysa, bizler: “ Hesh ga’p! bolip turadi” – dep aytamiz. Al bazi waqitlari jumis orinlarimizda, qatti eskertiwinen qapa bolip, qabag’imizdi u’yip otirg’animizdan go’re jumisimizdi toqtatip turip, barip keshirim soraymiz. Doslar, bizler keshiremiz, bizlerdi de keshiredi. Biraq qiyin teren’ qapashiliqlardi qalay keshiremiz? Bunday jag’daylarda keshiriwimiz kerek pe?

Bunday sorawlarg’a juwap tapqan adamlar bar eken. Sorawg’a juwap tapqanlar keshiriw ha’m keshiriliwdi shini menen basinan o’tirgen ha’m keshirim beriw qa’mshelli a’hmiyetli ekenin ju’da’ jaqsi biledi. Muxaddes Kitap bizlerge “Keshir ha’m sen de keshirilesen’” deydi. Eger Muxaddes Kitapta jazilg’anlardin’ haqiyqat ekenin o’zlerin’izde sinap ko’riwdi qa’lesen’iz, Qudaydin’ nizamina qulaq salip, kewlin’izdi qiynap, tasqa uqsap batip turg’an g’a’zep ha’m qapashiliqlardi umitiwg’a ha’reket etin’. Eger bilsen’iz budan en’ ko’p payda ko’rgen o’zin’iz bolasiz. Sebebi ishimizdegi g’a’zep ha’m qapashiliqlar bizlerdi Qudaydin’ bizlerge bolg’an niyetleri ha’m rejelerinen uzaqlastiradi. Ko’zlerimiz ha’m kewilimiz tiniqlasqanday boladi. Buni bu’ginnin’ o’zinde-aq sinap ko’rsen’iz boladi. Qiyin bolip ko’riniwi mu’mkin, biraq ha’reket etiwde dawam ete berin’. Quday bizler menen birge.