Assalawma a’leykum hu’rmetli doslar. Siz qa’dirli doslarimiz benen efir arqali ushrasip turg’animiz ushin Aspandag’i A’kemizge sheksiz minnetdarshiliq bildiremiz. Bu’gingi esittiriwimiz dawinda mikrofon aldinda men Sarbinaz sizler menen birge bolaman. Qa’dirli doslar, ha’zirgi ku’ni adamlardi, a’sirese pu’tkil jer ju’zindegi adamlardi qiynap atirg’an a’hmiyetli ma’selerdin’ biri Spid keselligi bolip esaplanadi. Hu’rmetli tin’lawshilar, tap usi kesellik haqqinda radio ha’m televideniye arqali, ha’m baspa so’zler arqali ko’p ma’rte esitemiz.

Biraq ko’pshiligimiz usi kesellikti teren’irek tu’sine almaytug’in shig’armiz. Eger ha’r bir adam keselliktin’ a’qibetleri haqqinda teren’irek oylap ko’rgende edi! SPID keselligi haqqinda ele ko’p na’rseni bilmegen adamlar, biletug’in adamlardan, a’sirese shipakerlerden sorap u’yrenip shiqsa jaqsi bolar edi.

Bul keseliktin’ ju’g’imli ekenin bizler jaqsi bilemiz. SPID keselligin juqturatug’in tiykarg’i sebebi bul narkomaniyaliq ha’m ta’rtipsizlik, yag’niy basqa adamlar menen bolatug’in jinisiy baylanis. Eger u’yde bir adam usi keselliktin’ infektsiyasin juqtirip alsa, shan’araq ag’zalari bul haqqinda bilmese, kesellikti olar da juqtirip aliwinin’ qa’wipi bar.

Bul kesellikti juqtirip aliwdin’da basqa sebepleri bar. Misali: tisin’izdi emletkenin’izde, shash alatug’in jerlerde, bir ma’rte paydalanilatug’in shpritsler ha’m tag’i basqa jollar arqali ju’g’iwi mu’mkin. Qa’dirli doslar, ha’r bir insan Qudaydin’ ko’rsetkeni boyinsha jasap, Onin’ nizamlarina a’mel qilsa, a’lbette Aspandag’i Akemiz O’zi bunday qorqinishli ha’m jerkenishli kesellikten qorg’aydi.

Ha’r bir insan o’z waqitinda shipakerge ko’rinip tekserinip turiwi, kerekli analizler tapsirip, tek g’ana usi keselliklerdi emes, al basqa keselliklerdi de o’z waqitinda aniqlap ko’rinip ju’rgen de ko’p na’rselerdin’ aldin aliwg’a ja’rdem beredi. SPID penen awirg’an adamnin’ pu’tkil immun sistemasi za’ha’rlenedi. Na’tiyjede insan organizmi infektsiyag’a qarsi gu’rese almaydi.

Ha’r bir insan o’z den-sawlig’i haqqinda qayg’iriwi lazim. Budan tisqari bul keselliktin’ awir na’tiyjeleri haqqinda aldinnan oylap ko’riliwi lazim. Insan ha’r qanday jaman na’rselerden o’zin alip qashiwi, uzaq o’mirge baslaydi desek adaspaymiz. En’ ayanishlisi, insan biraz ha’zlik ushin bul jerkenishli islerge qol uradi.

Ko’binese bunday islerdin’ a’qibetleri awir o’lim menen tawsiladi. Doslar, du’nyada bul kesellik penen awirg’an adamlar bar. Olar ha’r birewimizdin’ ibadatimizg’a mu’ta’j. Solay eken, kelin’, olar ushin da ha’mme waqit duwa etemiz. Qudayimizdin’ O’zi olarg’a miyrim-sha’pa’a’tin jawdirip, olarg’a shipa bersin.

Qa’dirli doslar, esittiriwimiz juwmag’inda sizlerge o’zlerin’izdi asiran’, Aspandag’i A’kemizge jaqinlasin’, Ol ha’r birewimizge o’mirdin’ mazmunin aship beredi dep sizler menen xoshlasamiz. Barqulla saw-salamat bolin’.