Assalawma a’leykum hu’rmetli Danaliq radiosi iqlasbentleri. Efirde ja’ne ken’esler haqqindag’i esittiriwimiz dawam etedi. A’lbette bizlerdin’ adamlardan ken’es alip turiwimiz, keleshegimiz ushin a’hmiyetli. Keleshekte usi alg’an ken’esimiz tiykarinda jasawimiz da bir -birimiz ushin a’hmiyetli. A’lbette, eger bul ken’es bizler ushin paydali bolsa yamasa basqasharaq etip aytatug’in bolsaq duris ken’es bolsa. Kelin’, bu’gin de o’mirimizde tez-tez bolip turatug’in ayirim na’rseler haqqinda sizlerge ken’es bersek.

Bizler atirapimizdag’i adamlardi su’yiwimiz kerek, al geybir adamlardan bolsa uzaqraq ju’riwimiz kerek pe? Degen soraw sizlerge berilse, ne dep juwap bergen bolar edin’iz? Kelin’, bu’gin sizler menen usi tema haqqinda sa’wbetlesemiz. Bul sorawg’a bir ga’p penen juwap beriw mu’mkin. Biraq bul juwap ko’pshiligimizdi qanaatlandirmawi aniq.

Sonin’ ushin da sorawg’a ko’p jaqlama juwap beriwge ha’reket etemiz. Jaratiwshimiz bizlerdi ha’r bir adamg’a qarata miyrimli boliwimizdi ha’m ha’mmeni ten’dey jaqsi ko’riwimizdi qa’leydi. Biraq bul ha’mme menen jaqin boliwimiz kerek degen ma’niste emes. Sebebi ayirim adamlar bizlerge jaman o’rnek boliwi da mu’mkin eken.

Bunday adamlar menen waqitimizdin’ ko’p bo’legin o’tiretug’in bolsaq, tez arada bizler de sonday islerdi qiliwimiz mu’mkin ha’m o’mirimizde qandayda bir ma’seleler payda boliwi da aniq. Eger bizler o’zlerimizdegi jaqsi ta’replerimizdi kimgedir o’rnek etip ko’rsete alsaq, bul a’lbette birewdin’ jaqsi ta’repke o’zgeriwine sebep boliwi da mu’mkin. Sonin’ ushin ayirim adamlar ushin o’mirleri, pikirleri o’zgeriwi ushin bizler de ha’reket etip ko’riwimiz kerek. Biraq bul jerde ju’da abayli boliwin’izdi sizlerge ma’slahat beremiz. Geybir waqitlari siz o’zin’izdin’ jaqsi ta’replerin’izdi og’an u’yretemen dep, ol adamnin’ jaman ta’replerin o’zlerin’izge o’tirip alman’.

Eger onin’ jaman ta’repleri sizge ta’sir etip atirg’anin sessen’iz ol adam menen baylanisti u’ziwin’iz maqulraq dep oylaymiz. A’lbette ol adam sizdi qandayda bir jerlerge mira’t etiwi mu’mkin. Yamasa sizge bir na’rselerdi shegip ko’riwdi aytiwi mu’mkin. Urliliq qiliwg’a, o’sek aytiwg’a, birewdi jamanlawg’a, buziqshiliq islewge ha’m tag’i usilarg’a uqsag’an jaman islerge baslasa. Sizdi gu’nag’a aparatug’in, ha’m Iysadan uzaqlastiratug’in na’rselerdi u’yrete baslasa. Kerisinshe, sonday waqitlarda siz o’zin’izde bolg’an ku’sh ha’m Muxaddes Kitapqa bolg’an bilimin’iz arqali ol adamg’a ja’rdem beriwin’iz de mu’mkin. Eger qanday jol tutiwdi bilmesen’iz o’zin’izden u’lken adamlar menen de ken’eslesin’. Geyde ko’plegen adamlar bunday adamlardan uzaqraq ju’riwdi aytadi. Eger sizge ju’regin’iz de usinday dese demek, en’ jaqsisi bunday adamlardan uzaqraq ju’rgenin’iz maqul. Biraq ila’ji barinsha ha’mme adamlarg’a ja’rdem beriwge ha’reket etiwimiz kerek. Bu’gingi ken’esimiz arqali ha’r birewimiz o’zlerimizge kerekli ha’m paydali juwap aldiq dep oylaymiz. Usinin’ menen esittiriwimiz de o’z juwmag’ina jetti, xosh-saw salamat bolin’.