Assalawma a’leykum qa’dirli tin’lawshilar. Sizler menen radiomiz arqali ushrasip turg’animizdan Jaratqan Iyemizge minnetdarmiz. Hu’rmetli doslar, berip atirg’an ken’eslerimiz sizlerge paydali bolip atirg’an bolsa budan bizler ju’da quwanishlimiz. Bu’gingi esittiriwimizde de sizlerge kerek ha’m paydali bolg’an ken’esimizdi, beriwde dawam etpekshimiz. Qa’dirli tin’lawshilar, adam o’zinin’ dushpanin jaqsi ko’riwi sha’rt pe? Eger sha’rt bolsa qalay jaqsi ko’riwge boladi? A’lbette birewdi dushpan dep aytiw onshelli jaqsi esitilmeydi. Biraq ha’zirgi ku’ni adamlar arasinda ko’p isletiletug’in so’z bolg’anlig’i ushin da bizler usi so’zdi paydalaniwimizg’a tuwra keldi.

Doslar, bizler ha’r birewimiz Quday ta’repinen jaratilg’an bendelermiz, ha’m jaratilisimiz da bir. Sonin’ ushin bizler ha’r birewimiz bir-birimizge tuwisqandaymiz. Bir-birimizdi su’yip, hu’rmet etiwimiz ju’da a’hmiyetli. Joqarida aytip o’tkenimizdey, bizler bir-birewimiz ha’m dushpanlarimizdi qalay su’yiwimiz mu’mkin. A’lbette bir-birewimizge etken jaqsiliqlarimiz arqali. Dushpanlarimizdi su’yiw bul olardi ha’r qanday jag’day da keshiriwimiz kerek ekenin ha’m bizlerge qarata etken islerine keshirimli boliwimizdi bildiredi. A’lbette kimdir sizge qarata da’mego’ylik etse ashiwin’iz keledi.

Biraq, sonday jag’dayda da sol adamg’a keshirim bere aliw bul dushpanlarimizdi su’yiw demek. Dushpanlarimizg’a da basqa doslarimizg’a bolg’an mu’na’sebette boliwimiz ha’m olardan o’sh almawg’a ha’reket etiwimiz de dushpanlarimizdi jaqsi ko’re aliwimiz degeni. Ne bolsada olardi qapa qilmaw jaqsi na’tiyje beredi dep sizlerdi isentire alamiz. Eger sizlerde bunin’ ila’ji joqqo degen pikir payda bolg’an bolsa siz haqsiz. Dushpanlarimiz bizlerdi a’lbette jaman ko’redi. Ha’r qanday jag’day da siz benen mag’an jamanliq qiliwg’a olar tayar turadi. Olar bizlerdi tu’rtip, urip yamasa jaman so’zler menen qapa qiliwi mu’mkin.

A’lbette bizlerge qilip atirg’an islerin bizler jaqtirmaymiz. Ashiwimiz kelip ha’mme na’rsege tayar boliwimiz mu’mkin. Biraq Qudaydan sabirliliq sorap olardi su’yiwge ha’reket etiwimiz jaqsiraq. Sebebi Quday Iyemizdin’qa’leytug’ini da usi. Eger bizler Qudaydin’ miyrim-sha’pa’a’tine sazawar boliwdi qa’lesek, demek, bizler Onin’ aytqanlarin orinlawimiz lazim. Sebebi bunday dushpanlarimizdi insan o’zgertiwi qiyin, buni tek g’ana Jaratqan Iyemiz qila aladi. Kim biledi dep oylaysiz bu’gin bizlerge dushpan bolg’an adamlar erten’ bizlerdin’ en’ jaqin adamimiz yamasa dostimiz boliwi da mu’mkin. Budan tisqari basqalardin’ bir-birine bolg’an mu’na’sa’betlerin ko’rip bizler o’zlerimizge tuwri juwap shig’ariwimiz mu’mkin. Qa’dirli tin’lawshilar kelin’, bir-birewimizdi ha’mme waqit hu’rmet etiwge ha’reket etemiz. Olardi jaqsiliq qiliwg’a, ko’plegen doslar arttiriwg’a shaqiramiz. Qa’dirli tin’lawshilar, sizler menen xoshlasar ekenbiz, sizlerge Jaratqan Iyemizden sabirliliq, ku’sh tilep xosh saw-salamat bolin’ dep qalamiz.