Assalawma a’leykum hu’rmetli Danaliq radiosi iqlasbentleri. Sizler menen ja’ne efir arqali ushrasip turg’animizdan quwanishlimiz. Doslar, bugin bizler sizlerge o’zlerimiz bilgen ha’m u’yrengen ken’eslerimiz benen bo’lispekshimiz. Bul ken’eslerimiz o’mirlerin’izde kerek boladi dep oylaymiz. Muxaddes kitapta bilay jazilg’an bir ayat bar. Bul haqqinda Matta kitabi 7 bap 12 ayatta jazilg’an: “Adamlardin’ sizlerge ne islewin qa’lesen’ler, sizler de olarg’a soni islen’ler”.

Geybir waqitlari adamlardin’ bul jazilg’an ayatti naduris tu’sinip, qabil etip atirg’anlarin esitemiz. Geybir doslarimizdin’ pikirlerinshe, eger kimdir sizge jamanliq qilsa, siz de olarg’a tap sonday jamanliq penen juwap beriwin’iz kerek ekenin aytadi. Bizler bolsa sizlerge bunin’ uliwma kerisi bolg’an ken’esti bermekshimiz. Yag’niy eger sizge qarata kimdir jaqsi mu’na’sebette boliwin qa’lesen’ler, siz de sol adamg’a qarata jaqsi mu’na’sa’bette boliwin’iz sha’rt. Eger jamanliqqa jamanliq penen juwap qaytarsaq, bizlerge odan qanday payda boladi. Jaratiwshimiz Aspandag’i A’kemiz ha’tteki dushpanlarimizdi da su’yimizdi qa’leydi.

A’lbette bul qiyin. Biraq adamlardin’ oy-pikirlerin o’zgertiw ha’m olardi tek g’ana jaqsiliq qiliwg’a shaqiriwdin’ jalg’iz joli da usi jerde jasiring’an. Ne ushindir adamlarg’a jaqsiliq qiliwdan ko’re, jamanliq qiliw an’satraq. Doslar, sizlerdin’ pikirlerin’iz qanday? Ne ushin bunday dep oylaysiz? Jamanliqqa jamanliq penen qaytariw jaqsi emes ekenin bizler bilemiz. Bizlerge jamanliq qilg’an adamlardi jazalaw bul bizlerdin’ jumisimiz emes, budan tisqari bizlerge bunday huquq ta berilmegen. En’ jaqsisi bul adam menen bul ma’sele haqqinda ashiq so’ylesip alg’an maqul.

G’azep u’stinde bul ma’selege sheshim tabiwg’a ha’reket etsek, bul sol waqiyanin’ ja’nede qizip ketiwine sebepshi boliwi mu’mkin eken. Budan tisqari jamanliqqa bunday juwap qaytariw bul jag’daydi ja’nede qiyinlastiradi. Duris bizler o’zimizdi qanday da bir jol menen qorg’awimiz kerek, biraq bul birewden o’sh aliwimiz kerek degen ma’nisti bildirmeydi. Ba’lkim bul bir qarag’annan adalatli emes dey bolip ko’riniwi mu’mkin. Biraq xalqimizdin’ “sabirdin’ tu’bi sari altin” degeni maqali bar. Bul jerde sizge ja’ne bir a’hmiyetli bir na’rse haqqinda aytip o’tpekshimiz. Eger bizler jamanliqqa jamanliq penen qaytarmay, kerisinshe, jaqsiliq etsek. Tas bawir adamnin’ da ju’regi eriydi. Bul bolsa haqiyqiy ma’rt adam ekenin’izdi ko’rsetedi. Hu’rmetli doslar, ha’mme waqit jaqsiliq islew siz ha’m bizge barqulla yar bolsin. Keyingi esittiriwimizde ja’ne ushrasqansha saw-aman boliw.