Assalawma a’leykum hu’rmetli radio tin’lawshi doslar. Sizler menen ja’ne ma’wsimlerdin’ kelinshegi bolg’an ba’ha’r ma’wsiminde ushirasip turg’animizdan quwanishlimiz. Qa’dirli tin’lawshilar, bizler ja’ne o’zimiz bilgen, esitken ha’m ko’rgen ken’eslerimizdi sizlerge beriwde dawam etemiz.

Qa’dirli tin’lawshilar, kelin’, bu’gin sizler menen biraz kompyuterler haqqinda kerek bolsa olardin’ paydali ha’m ziyan ta’repleri haqqinda sa’wbetlesemiz. Sa’wbetimiz basinda kompyuter bizlerdin’ ma’mleketimizge qashan kirip kelgeni haqqinda biraz toqtalsaq.

Shama menen 1990 shi jillarg’a shekem bizler kompyuter haqqinda kem mag’liwmatlarg’a iye edik. Og’an shekem barliq isler, a’sirese, ka’rxanalarda qol mashinasinda jazilatug’in edi. Ha’zirgi ku’nge kelip, onin’ ornin kompyuter iyelep aldi. Bul a’lbette jaqsi, sebebi kompyuter ha’r bir insandi jan’a bilimge intiliwi ushin bir tu’rtki boldi. Biraq, sol adamlardi awirin jen’il qilip atirg’an kompyuterdin’ basqa ziyan ta’repleri haqqinda ne dep oylaysiz? Bul bizlerge, balalarimizg’a o’z ta’sirin qalay o’tirip atir. Ne dep oylasiz, onin’ jaman ha’m ziyan ta’repleri barmaken? Eger bolsa olar neden ibarat.

Kelin’, usilar haqqinda da biraz oylap ko’remiz. Sebebi ha’zirgi ku’ni bul haqqinda oylamaw, bizlerdin’ ta’repimizden biraz aqilsizliq boladi. Usi orinda men o’zim ko’zim menen ko’rgen waqiyani sizlerge aytip beremekshimen. Bir ku’ni azanda saat jeti yarimlarda, birden dalada qayg’ili dawis penen jilap atirg’an bala meni biraz sergeklikke shaqirdi. Aynadan dalag’a qarasam bir kishkene bala anasina qarsiliq etip, bag’shag’a barmaytug’inin aytip atirg’an eken. Anasi oni qansha ma’jbu’rlese de bala yaq dep, ayaq tirep alg’an. Sonda men bul waqiyanin’ ne menen tawsiliwin aqirina shekem sabirliliq penen ko’riwge qarar ettim. Aqiri bul kishkene bala u’yinin’ aldinda ashilg’an kompyuter klubqa kirip oyin oynayjag’in tu’sindim.

Biraq biyshara anasi bul kompyuter klub ele ashilmag’anin, saat ele jeti yarim ekenin balasina tu’sintiremen degeninshe biraz ashiwlanip, ter to’gip qiynaldi. Hu’rmetli tin’lawshilar, eger bizler kompyuterden duris paydalana alsaq, bul a’lbette jaqsi. Ha’mme na’rsenin’ de o’zine jarasa jaqsi ha’m jaman ta’repleri bar. Odan qalay ha’m ne ma’qsette paydalaniw bizlerge baylanisli. Qa’dirli doslar, Jaratqan Iyemiz ha’mme waqit bizlerge danaliq beriwin Odan sorap ju’reyik. Doslar, sa’wbetimiz juwmag’inda sizlerge aytajag’imiz, kompyuterdin’ u’stinen sawatimizdi o’zlerimiz ha’m balalarimiz teren’ iyelewine ha’reket eteyik. Sebebi bizler jasap atirg’an da’wir texnika da’wiri. Usinin’ menen hu’rmetli doslar, bu’gingi sa’wbetimiz o’z juwmag’ina jetti. Keyingi esittiriwlerimizde ushrasqansha saw aman bolin’.