“Men – haqiyqiy ju’zim ag’ashiman, al A’kem bag’man. Mendegi jemis bermeytug’in ha’r bir shaqani Ol kesip taslaydi. Jemis beretug’in ha’r bir shaqani ja’ne de ko’birek jemis bersin dep, putap tazalaydi.” (Yuxan 15:1-2)

Assalawma a’leykum doslarim. Bu’gingi sizler menen bo’lisejaq bolg’an temamizdi oqip tu’singen shig’arsiz. Bu’gin sizler menen ju’zim ha’m onin’ shaqasi haqqinda sa’wbetlesimiz. Sizge ju’da jaqin bolg’an adam qaytis bolip atirg’aninda qasinda bolg’ansiz ba? Ol adam sizge axirg’i so’zlerin aytiwg’a ha’reket etken be? O’liminen aldin jaqinlarina axirg’i so’zlerin aytajaq bolg’an adamlardin’ awhalin ko’z aldin’izg’a keltire alasiz ba? Menimshe bunday waqitta ol adamdi diqqat penen tin’lawg’a ha’reket etesiz, onin’ so’zleri qulaqlarin’izda bir o’mir esitilip turadi.

Axirg’i so’zlerin aytajaq bolg’an insan bul Iysa Masiyx ekenin ko’z aldin’izg’a keltirip ko’rin’. Oni qanday diqqat penen tin’lag’an bolar edin’iz? Iysani satip ha’m tu’tip beretug’in keshte, Iysa O’z sha’kirtlerin jiynap olarg’a axirg’i so’zlerin aytqan edi. Ele tan’ atpay turip Oni sabalap urip, basina tikennen islengen taj kiydirip, atanaq ag’ashqa qaqqan edi. Oni aldinda bunday azaplar turg’anin Ol jaqsi biler edi. Sonin’ ushin Iysa pu’tkil xosh xabardin’ ju’regi bolg’an sabaqti aytip berejaq edi. Iyemiz bul axirg’i ta’limin aytiw ushin ju’da qolayli waqit tawg’an ha’m, oni a’jayip g’amxorliq penen aytip bergen.

“Iysa sha’kirtleri menen keshki awqatqa otirdi. Shaytan a’lle qashan Shimon uli Yahuda Isqariottin’ kewline Iysag’a satqinliq qiliw niyetin salg’an edi. Iysa A’kesinin’ ha’mme na’rseni Onin’ qolina bergenin, O’zinin’ Qudaydan kelgenin ha’m Qudayg’a qaytip baratirg’anin bilip, dasturxan basinan turdi. Sirtqi kiyimin sheshti de, bir su’lgini alip beline bayladi. Son’inan la’genge suw quyip, sha’kirtlerinin’ ayaqlarin juwip, belindegi su’lgi menen su’rte basladi.” Yuxan 13:2-5. La’genge suw quyip, beline su’lgi baylap, ayaqlarin juwip atirg’an , barmaqlarinin’ arasindag’i kirlerin alip taslap ayaqlarin juwip atirg’anin ko’rgen sha’kirtleri “Ne ushin Erten Patsha bolatug’in adam bu’gin o’zin pa’s alip sha’kirtlerinin’ ayaqlarin juwip atir?” degen oylar menen sha’kirtleri hayran bolip turar edi.

Yuxan 13:21 ayatinda “Sizlerge shinin, haqiyqatin aytaman: aran’izdag’i birin’iz mag’an satqinliq isleydi” degen Iysanin’ so’zleri sha’kirtlerin og’ada oylantirdi. Hayran bolg’an sha’kirtleri bir-birlerine diqqat penen qaray basladi. Son’ Iysa Petrg’a qarap, bu’gin tan’ atpay turip sen Mennen u’sh ret tanasan’ dep boljadi. Sha’kirtleri Iysa menen u’sh jil dawaminda birge boldi, biraq axirg’i bir neshe aylarda Iysa O’zinin’ o’limi ha’m qayta tiriliwi haqqinda aytip olardi O’zinin’ atanaq ag’ashtag’i o’limine tayarlap atirg’an edi.