Assalawma a’leykum hu’rmetli doslar. Sizler menen efir arqali ushrasip turg’animizdan quwanishlimiz. Doslar, aramizda ha’r turli qimbat bahali taslarg’a iye boliwdi qa’lemeytug’in adamlar kemnen-kem ushrasa kerek.

Misali, brilliant, altin, gu’mis usilarg’a uqsag’an qimbat bahali taslardi ko’pshilik aliwdi qa’leydi. Sebebi olar ju’da qimbat bahali taslar bolip tabiladi. A’dette bunday taslar bir jerlerde jasirinip jatadi, olardi tabiw ushin qatti miynet etiw kerek boladi.

Ha’reketke bereket, degendey, olardi tek izlegen adam taba aliwi mu’mkin. Hu’rmetli tin’lawshilar, sizler bu’gin usinday taslardi izlep tabiwg’a ha’reket etip ko’resizbe? Biraq ol an’sat bolmag’an miynetti talap etedi. A’lbette bul qimbat bahali taslardi Qudaydin’ Muxaddes Kitabinan tabiwimiz mu’mkin.

Usi qimbat bahali so’zlerdi tawip o’mirlerimizde qollaniwimizdi Jaratqan Iyemiz ju’da qa’leydi. Quday O’zinin’ qimbat bahali so’zlerin bizlerge sawg’a retinde bermekshi. Eger olardi alip ju’reklerimizge jaylastirsaq Jaratqan Iyemiz ju’da quwanadi. En’ a’hmiyetlisi Ol usilar arqali o’mirimizdi jarilqaydi.

Qa’dirli doslar usi qimbat bahali taslardi an’satraq tabiwin’iz ushin sizlerge jeti a’jayip qa’demlerdi aytip o’tpekshimiz. Birinshi qa’dem: Jaratqan Iyemizden O’zi haqqinda sizge qanday da bir na’rseni ko’rsetiwin soran’. Ekinshi qa’dem: Muxaddes Kitaptan bir bo’limin alip oqip, oni tu’siniwge ha’reket etin’. Usi oqig’an bo’limin’izde Quday tuwrali yamasa Onin’ isleri haqqinda nelerdi bilip alg’anin’izdi oylap ko’rin’. Ushinshi qa’dem: Usi oqig’anlarin’izdi ha’m Quday tuwrali bilgenlerin’izdi da’pterin’izge jazip barin’. To’rtinshi qa’dem: Quday tuwrali u’yrengenlerin’izdi jaqsilap tu’sinip aliwin’iz ushin Qudaydan ja’rdem soran’. Besinshi qa’dem: Usi u’yrengen haqiyqatlarin’iz tiykarinda Qudayg’a minnetdershilik bildirin’ ha’m tek Og’an tabinin’. Altinshi qa’dem: Barliq u’yrengen haqiyqatlarin’iz tuwrali ku’n dawaminda oylawg’a ha’reket etin’. Aqirg’i jetinshi qa’dem: Jaqinlarin’iz benen bo’lisin’.

Usi jeti qa’demdi barqulla orinlap ju’rsek, Quday A’kemiz a’lbette jarilqaydi. Bular adamnin’ o’mirindegi en’ a’jayip qimbat bahali g’a’ziyneler bolip esaplanadi. Bul g’a’ziynelerge tek g’ana Jaratqan Iyemizdin’ ja’rdemi arqali erise alamiz. Qa’dirli doslarim, sizler menen ja’ne efir arqali ushrasqansha dep qalaman.