Assalawma a’leykum hu’rmetli doslar. Sizler menen Danaliq radiosinda ushrasip turg’animizdan quwanishlimiz. Jaqinda bir tanisimnin’ toyina awilg’a bardiq. Awil adamlari sada ha’m ju’da kewilge jaqin ha’m irimshi boladi eken. Olardin’ ha’r turli irimlari haqqinda esitip, geyde ju’regin’ awiradi, geyde ku’lgin’ keledi. Olar birewdin’ jiyde terektin’ astinda uyxlap qalg’ani ushin jin urip ketken, esi awip ketken dep isenedi. Qaladag’i adamlar bunday ga’plerge ko’binese isenbeydi. Jaqsilap oylap ko’rsen’iz, adamlarg’a ziyan keltiretug’in jawiz ruwxlar bar. Bunday jawiz ruwxlar haqqinda Muxaddes Kitapta da jazilg’an. Adam Qudaydi tanip baslag’aninan, Iysa Masiyxti qutqariwshim dep qabil etkennen keyin ha’m jin uriwi mu’mkin be degen soraw ko’p adamlardi oylantiradi. Bul sorawg’a ha’r kim ha’r qiyli juwap beriwi mu’mkin. Biraq bu’gingi sa’wbetimizde bul sorawg’a juwapti Muxaddes Kitaptan izleymiz.
Eger bizler Iysa Masiyxti o’zimizdin’ qutqariwshimiz dep bilsek, ha’m Muxaddes Ruwxqa tola bolsaq, jawiz ruwxlardin’ torina tu’speymiz. Bizler Ruwxtan tuwilg’animizda, bizlerdin’ ruwximiz Iysanin’ qani menen juwiladi. Shaytan bizlerge qol tiygize almaydi. Sebebi Muxaddes Kitap bul haqqinda bilay deydi: “Sebebi sizlerdegi Muxaddes Ruwx du’nyadag’i ruwxtan ulli” (1 Yuxan 4:4). Iysa bizlerdin’ ishimizde jasaydi, sonin’ ushin da jawiz ruwxlarg’a orin joq. Biraq shaytan kewlimizge ta’sir o’tkeriwi mu’mkin ha’m bizler tu’skinlikke tu’sip qaliwimiz mu’mkin. Tu’skinlikke tu’skennen keyin qiynalamiz, ruwxiy kesel bolamiz, fizikaliq jaqtan da awiriwimiz mu’mkin. Biraq bizlerdi Quday ha’mmesinen de azat ete aladi.
Ha’r bir adamnin’ denesi u’sh bo’limnen ibarat eken: dene, kewil ha’m ruwx. Dene – bul tek g’ana u’stingi qabat esaplanadi. Ol ruwx ha’m kewil arqali baylanista boladi. Kewil bizlerdin’ an’imizdi, ishki-sezimlerimizdi ha’m erkimizdi o’z ishine aladi. Shaytan bizlerdin’ an’imiz ha’m ishki-sezimlerimizdi urlaw qa’siyetine iye, biraq bizler Qudayg’a jaqin bolsaq, ol bizlerdin’ ruwximizg’a jaqinlasa almaydi. Tiykarg’i ma’sele bizlerdin’ ruwxiy o’mirimizge, gu’nag’a ha’m bul du’nyada qalay jasawimizg’a baylanisli. Doslar, bizler gu’na islewden qaship, ha’mme waqit Qudaydi izlep jasaymiz ba? Eger usinday bolsa, shaytan bizlerdin’ an’imizg’a ha’m kewilimizge hesh qashan jaqinlasa almaydi. Jawiz ruwxlar o’zine tek g’ana ruxsat berilgen jerge iyelik ete aladi. Eger o’mirimiz ruwxiy ku’shsizligimiz sebebinen olarg’a kewilimizge ha’m o’mirimizge kiriwine ruxsat bersek, olar da’rriw kirip aladi.
Sonin’ ushin Qudayg’a isengen, Iysani Iyem dep qabil etken adam, ha’mme waqit kewlin Muxaddes Ruwxqa toltiriwi kerek. Buni adam o’zi qila almaydi. Qudayg’a jaqin boliw, barqulla Onin’ dawisin esitiw, erkin biliwge ha’reket etiw, Muxaddes So’zin ha’r ku’ni oqiw, og’an boysiniw, bizlerdi shaytannin’ hiylelerinen, jawiz ruwxlardin’ hu’jimlerinen qorg’aydi. Jaratqan Iyemiz bizlerdi shaytannin’ torinan azat etedi, sebebi bul torlar bizlerdi Qudaydan uzaqlastiradi, o’mirde ko’p jaman tosqinliqlar etedi, bizlerdi ha’r qiyli kesellikler menen baylap qoyadi ha’m qiynaydi.
Qa’dirli tin’lawshilar, bul tema boyinsha ko’birek biliwdi qa’lesen’iz, bizlerdin’ danaliq.com elektron saytimizg’a mira’t etemiz. Doslar, sizlerdi Quday jarilqasin. Xosh-saw aman bolin’.
